Chilam氹掂 張家輝開金口
下月６至８日舉行個唱的張智霖前晚於活動上表示終於落實個唱嘉賓名單，雖不肯透露嘉賓是誰，本報卻收到可靠消息，頭炮是影帝張家輝，並加入先進技術的3D投射效果舞台元素，為歌迷帶來驚喜。
張智霖（Chilam）近期忙於籌備演唱會《CHI LAM CRAZY HOURS LIVE 2014》，前晚他與劉心悠、Rosemary、李嘉慧等出席活動，Chilam終開腔表示已落實嘉賓名單，但故作神秘不肯透露，只笑說是既震驚又有新鮮感。據知第一炮的嘉賓是影帝張家輝，其實家輝屬唱得之人，他在今屆金像獎頒獎禮中獲頒影帝，在台上致謝詞時即興清唱幾句電影中的英文歌《The Sound of Silence》，令大家拍爛手掌，如今在Chilam個唱中大開金口，實令歌迷大飽耳福。聽覺享受外，Chilam不惜工本引入先進科技，於舞台增設3D立體投射技術，該技術曾於去年美國樂壇盛事Billboard音樂頒獎禮中使用，令已故Michael Jackson「翻生」大跳招牌舞Moonwalk。
帶囝囝紅館撐場
Chilam又表示魔童就讀國際學校已放暑假，他坦言因忙於籌備演唱會而不會出埠旅行：「帶佢去紅館後台玩囉，但就唔會畀佢上台。」他又表示有兩件關於演唱會的事要說：「第一，我嘅親人同朋友唔好送花，我覺得用錢做善事更加好，好似草蜢同Eason（指陳奕迅）就試過買米送畀有需要嘅人，更加有意義。第二件事就係我演唱會嘉賓已落實，係好震撼，會帶畀觀眾大驚喜，我好滿意。（透露吓？）透露就冇神秘感。」他稱三場演唱會邀請三個嘉賓，其中一個從未請過，有男亦有女。問到是否誠意打動？他笑說：「三個嘉賓都係我自己請，係誠意打動。」提到袁詠儀自購百多張門票是否已送給親戚朋友？Chilam說：「佢要追加，入晒我數，不過我都願意，我認為演唱會唔係工作，而係朋友見面地方。」
同場的劉心悠以一頭短髮現身，她坦言很愛短髮造型，較有個性與女人味。問到男友鍾意她長定短髮時，她說：「我都冇男友。（之前啲男友呀？）唔清楚，我一向長頭髮，未試過短頭髮。」她又自爆不喜愛另一半留長髮：「感覺好污糟，係衞生問題。」
文：名人組