李麗珍搵肥菜試水溫
李麗珍（珍妹）與老友葉蘊儀（Gloria）情同姊妹，昨日兩人就孖住出席活動，珍妹透露她的自家飾物品牌將於下月推出，當然會找好姊妹Gloria幫手，還打算把產品放在對方的店內寄賣。
李麗珍和葉蘊儀這對好姊妹昨日孖公仔出席時裝騷，同場嘉賓還有孖仔組合Soler，以及藝人高皓正一家四口。現場有一班小朋友行騷，問珍妹與Gloria可會想生番個小朋友？兩人即耍手擰頭，珍妹說：「趕唔切，今日唔係講生仔呀，係嚟戥朋友開心，如果有日我哋可以有自己嘅品牌都會好開心。」
問到珍妹籌備中的自家飾物品牌生意，她說：「諗緊個名，可能會用個M字，啱我哋，我想用Memories，代表回憶。我嗰啲係用colour stone造嘅飾物，可以用嚟襯衫，鑽石好貴。網上嘅嘢我唔識，電腦嘢完全唔識，要搵朋友幫手，試過有次用唔到電腦，原來未開掣。產品方面嘅嘢就會搵肥菜（葉蘊儀在《女人俱樂部》的花名）幫手，佢依家有自己嘅舖，遲啲我嘅產品會擺喺佢度試吓賣先。」Gloria指珍妹的品牌應會於下月推出，珍妹說：「我好慢熱，肥菜成日催我快啲。」兩人又透露父親節會與爸爸及家人一起吃飯慶祝，並會封利是給爸爸作禮物。
Dino囝囝做接班人
同場Soler細孖Dino被問到父親節怎樣慶祝？他笑言只有一歲半的囝囝仍未知道他是父親，故沒有正式慶祝，但他依然感到開心，會努力做好父親這個角色，又大讚囝囝有表演天分：「好開心好快可以退休，有接班人。佢成日見我哋練歌，又會跟埋我哋去做嘢，見到慢慢會吸收。我最安樂係帶佢出街好安心，佢唔會喊。」
文：名人組