阿叻中600倍波膽 寸盡阿倫志偉
上屆世界盃冠軍西班牙昨日對荷蘭慘敗1：5，令不少藝人大跌眼鏡！鄭丹瑞（阿旦）以夢話揶揄表現失準的西班牙門將卡斯拿斯，不過荷蘭擁躉陳百祥（阿叻）則坐收漁人之利，勁中600倍波膽，開心得失眠，更藉此寸爆好友阿倫和志偉！
昨日凌晨舉行的世界盃西班牙對荷蘭賽事，兩強對碰備受矚目，最終荷蘭以5：1反勝上屆冠軍西班牙，亦令一眾「牛迷」大跌眼鏡！不過在《東網－叻人講波》分享睇波心得的荷蘭星級擁躉陳百祥（阿叻），則買中了600倍波膽，開心得瞓唔着覺，他笑說：「我講咗o架啦，開波前有人同我拗，西班牙讓荷蘭2球，我話調番轉就差唔多！波膽我都中埋，叫咗黃杏秀買荷蘭贏4:1、5:1、6:1！（600倍波膽好和味？）買10元啫！（仲有邊隊波夠荷蘭踢？）南美球隊巴西、阿根廷、烏拉圭，歐洲冠軍西班牙都搞成咁，其他唔夠踢啦！（同曾志偉、譚詠麟賭牙骹？）業餘同職業好難比喎，佢哋無論踢波定賭波都係業餘！」
阿姐被賽果嚇窒
身為西班牙擁躉的鄭丹瑞（阿旦）似乎難以接受愛隊「被數」的壞消息，在微博揶揄西班牙門將卡斯拿斯的表現，笑言連自己的「水」平亦可取代對方，他留言：「我做了個夢，夢見迪保斯基（西班牙領隊）打電話給我，邀請我去代替卡斯拿斯！我問他：你知道我是誰嗎？他答：知！亞洲第一紙板鋼門嘛！那你還夠膽請我？我問。因為你這個紙板鋼門稱號，已被卡斯拿斯一舉奪走了！」阿旦的一番「夢話」，令一向都是球迷的李克勤笑答：「講呢啲！」另外，身為西班牙球迷的高海寧（高Ling），原本在西班牙入球時已即在微博報喜：「OH YES！1：0！這就叫邪不能勝正！」但當睇到完場後，她亦只能面對現實：「輸得咁難睇真係冇諗過……不過真心支持嘅無論贏定輸都會繼續支持！」而少有睇波的汪明荃（阿姐）在微博表示有留意此賽事，她指回到家時西班牙亦贏緊1：0，但未幾賽果亦令她嚇窒：「剛沖完涼出來，比賽竟然是──西班牙1：5荷蘭！」
文：專案組