劉愷威掛女心切 小糯米留港讀書

靚媽楊冪端午節前夕誕下囡囡「小糯米」後,母女昨日出院,劉丹夫婦、劉愷威及胞妹等乘車到場接送,其後愷威傍實愛妻出現,自爆開心到喊的他更稱離開幾步都會掛住囡囡,所以萬千竉愛的「小糯米」將留港生活及讀書。

內地女星楊冪端午節前夕剖腹產女,經過五日休養,昨日以上佳狀態出院,劉丹夫婦、劉愷威胞妹及楊冪經理人昨日十時許先後乘車到場,接送母女二人。約上午十一時許,氣色紅潤的楊冪由老公劉愷威「傍實」現身,以藍色披肩搭配短裙遮肚的她依舊面尖尖及手腳纖幼,未有出現產後臃腫情況。愷威則手挽放着囡囡「小糯米」的白紗嬰兒籃步出醫院正門,現場所見,其囡囡正在籃內甜甜睡着,當他們應要求拍全家福時,愷威頻頻以手遮掩囡囡,似乎深怕她被閃光燈驚醒,認真愛女心切!其後愷威夫婦及劉丹夫婦笑容燦爛地感謝傳媒的祝賀。

步履輕快的楊冪在奶奶、其經理人及愷威胞妹開路下,登上七人車等候愷威一同離去。而愷威確認家人安全上車後即興奮接受訪問,大爆「升呢」做爸爸的感受,他直認開心到喊及離不開囡囡:「好開心,離開幾步都會好掛住囡囡!(第一眼見到愛女開心到喊?)真係好開心,都唔記得自己幾時喊,心情難以形容,依家先有少少習慣做爹哋。(囡囡似邊個?)集爸爸、媽媽、爺爺同嫲嫲於一身!」

學換尿片

問到愷威有否為囡囡餵奶及換片?這位新手爸爸笑言正在學習:「要趕返去換片。(雞手鴨腳?)OK,仲學習緊!(囡囡姓名?)未改呀!(搵相士改?)唔會,搵爹哋(劉丹)改!」至於有孫萬事足的丹爺昨接受電話訪問時笑晒稱已定湊孫時間表,但毋須向劇集《愛.回家》請假:「日頭開工夜晚就見到孫女啦!(留港讀書?)會喺香港生活、讀書,香港教育唔錯,(搵定學校?)又唔使咁快,我哋都唔會畀壓力佢!」

文:影視組