安祖蓮娜單拖 畢佬匿埋整餅

安祖蓮娜日前與畢佬及三名仔女到上海，準備為《黑》片宣傳，而她昨日就單拖谷戲，穿上一襲黑色Deep V服飾的她先於東方明珠電視塔前拍攝硬照，一度被內地傳媒形容為「東方明珠與西方明珠的合影」。而她隨後出席記者會。除了力Sell電影，她又識做表示有帶仔女遊覽，更大爆畢佬現正身處酒店與仔女學做中式糕點，而且明言有意與中國電影人合作。另外，大會就趁安祖蓮娜今日（6月4日）生日，送上首飾和立體蛋糕，又唱中文生日歌，令她大為驚喜！

會合睇畫展

而講到未來計劃時，安祖蓮娜就指希望重心轉移導演工作，更明言想再與畢佬合作。事實上安祖蓮娜早前接受電台訪問時承認正接洽拍攝伊莉莎伯泰萊（Elizabeth Taylor）經典作品《埃及妖后》（Cleopatra），前日亦爆出電影可能為其「幕前收山作」！據英國《每日郵報》（Daily Mail）報道，安祖蓮娜於訪問中講及角色時明言：「呢個可能係一個想投入所有嘢去做嘅角色，而且喺呢度收尾同完結。」她亦表示自己一直較熱衷做導演及慈善工作。不過完成記者會之後，畢安與三名子女就去了龍美術館西岸館欣賞名畫。而昨晚七時他們已離開上海返美國，並沒有出席昨晚舉行的首映。

險被捐褲浪

另一方面，畢佬就自上周被愛爾蘭記者Vitalii Sediuk於首映禮上襲擊後首度開腔回應事件：「個癲佬一埋身就不停想將個頭埋喺我褲浪，我試圖破解，雖然唔係好大力但都令到佢放手，不過我諗Vitalii當時似想伸手拉啲嘢，因為班人（保安）喺佢上面，佢一伸手向上就拉到我副眼鏡。」另外，畢佬又表示其實自己都貪玩，不過指Vitalii的舉動會影響公開活動以及辛苦排隊的粉絲！

文：外娛組