阿姐華麗變身做港版「千頌伊」
藝人汪明荃、劉松仁、方力申、鍾嘉欣等昨日為無綫新劇《華麗轉身》試造型及拜神，劇中演大明星的汪明荃戲內打扮華麗，形象百變，又有助手鍾嘉欣糟質及劉松仁暗戀，如同化身阿姐版「千頌伊」。
汪明荃在劇集《華麗轉身》扮演大明星有不少華麗造型，變身阿姐版「千頌伊」：「今次唔使出私伙，啲衫有專人設計。」阿姐向來出名守時及對工作要求高，與其合作的藝人也不敢遲到，阿姐笑言：「我依家唔敢早到，廢事乞人憎啦，等我遲到畀大家睇，希望大家拍得舒服啲。」松哥笑說：「咁等阿姐帶領我哋遲到。」劇中暗戀大歌星的松哥笑言劇中冇女伴，阿姐笑指：「咪有你舊情人米雪囉。」松哥笑說：「事實唔可以喺呢度講。」
方力申唔畀女友依靠
方力申9年冇為無綫拍劇，講到與阿姐合作，他笑說：「都緊張，啲人忠告係唔可以遲到，仲要早到，因為遲過阿姐就叫遲到。」方力申近年在大陸發展，問到為拍《華麗》損失多少？他說：「難得TVB搵我，冇得咁計，自己都好想用廣東話拍劇。」此外，方力申昨晚出席藝術活動時，被問到何時與女友鄧麗欣合資買樓﹖他笑謂：「結婚先講。（你哋資產唔係一齊？）我依家拍拖咋，講呢啲，現代女人要靠自己，男人唔可靠，我靠佢就得，大家要經濟獨立，咁責任會少啲。」
鍾嘉欣怕被人捉錯處
鍾嘉欣在劇中演大明星汪明荃助手，經常被阿姐糟質：「今次會着得好fashion跟番個潮流，但因服飾好多，要好小心連戲，唔係出到街畀人捉錯處。」劇中嘉欣被扮有錢仔的小方欺騙感情：「劇中感情失敗，希望現實唔失敗啦。」此外，嘉欣昨晚出席藝術活動時，自認係瘋狂購物狂。
文：影視組