Coffee遭性騷擾喊爆
曾拍劇胸壓馬國明的「天使妹」林芊妤（Coffee）形象性感，引來不少狂蜂浪蝶，近月有男網民連番在微博向她性騷擾，除留言露骨外，更向她傳送超惡心男女下體照，令Coffee大驚半夜狂喊！
不少女藝人都曾被性騷擾，最近再有受害者，就是曾任「Sing之天使」的24歲無綫藝員林芊妤（Coffee），去年Coffee在熱爆劇《衝上雲霄II》中胸壓機師馬國明，身穿三點式大晒34D驕人身材，胸前大痣甚為搶眼，此劇情一度成為熱話，帶挈Coffee粉絲量大增，亦令她被不少好色之徒睇中！
狂傳不雅照示愛
近月有多名網民透過微博向Coffee示愛，當中一名內地男網民更當正Coffee是女朋友一樣，發出親暱露骨留言，如「哥要愛護你、守護你一生」、「抱住你的腳了，你會感覺好點」等，Coffee未有回覆，他竟變本加厲發送多張男女下體不雅照，嚇得Coffee大驚並急急刪除他，可是對方轉用新帳戶再「步步進擊」，Coffee忍不住回覆鬧爆，但對方厚臉皮照樣示愛說：「夢見妳很多次，我再也抑制不住內心感受，希望你理解！」將怪行當作正常事一樣，令Coffee不勝其煩。
Coffee接受電話訪問表示事件令她極度不安，大鬧對方行為惡心，亦曾害怕得半夜狂喊，她說：「佢好恐怖，搞到我唔敢開微博，想同啲正常粉絲傾偈都唔敢！呢幾個月精神受好大困擾，刪咗佢又再出現，仲當正自己係我男友咁，好驚佢有進一步行動，半夜出街都會驚，都幾無助。（報警？）未會住，希望公開咗佢嘅惡行，佢會收斂。」
文：影視組