陳柏宇蒲王月袋半百萬 泳兒捱摸封吧后

近年香港樂壇市道低迷，搵錢機會買少見少，二、三線歌手紛紛到廣東省一帶唱酒吧騷掘金，當中陳柏宇（Jason）和泳兒成了各地吧場台柱，每周必返內地唱一轉，兩人密密接騷，獲行內人封為「吧王吧后」，Jason一個月最高峰做足10場，以一場4至5萬人民幣計，勁賺約50萬人民幣，泳兒每月走6至8場騷，以每場收6至8萬人民幣，月賺約64萬人民幣，而洪卓立、關楚耀、小肥及女子組合As One等都是內地酒吧騷常客。

唔怕Cheap

對於獲封「吧王」，Jason笑言：「邊有咁多，有就發達，可以買千萬豪宅，冇唱咁多，最多6場啫。（4、5萬人仔歌酬？）收得咁準！其實都多謝之前拍咗電影《喜愛夜蒲》，先多咗內地騷唱。」對於撼低洪卓立做「吧王」，Jason則說：「唔好咁講，佢都好勤力。」

Jason樂於唱吧騷，並謂：「大約45分鐘唱三首歌，同觀眾握手、影合照都賺得幾開心。咁冇法，搵食嘛，除咗唱歌以外嘅工作唔多，試過有啲場太細，我企喺一個木箱咁大嘅台上面唱都試過。」對於不少香港歌手嫌吧場太Cheap不接？Jason坦言：「唔覺Cheap，如果我有幾千萬身家就話唔唱啫，佢哋唔唱仲好，可以搵多啲我，畀晒我唱。」談到辛酸史，Jason稱試過被觀眾掟食物盒和薯條。

至於「吧后」泳兒對跑內地吧場做騷，承認搵到錢，卻有不少辛酸史，試過返內地做騷，來回要12小時，坐到暈車浪，又遇過醉漢衝上台，突破防線，將她同事一手揈開，幸好有保安截住才沒事。

洪卓立被摸

問泳兒可有遇過鹹豬手？她稱有次獻唱時，突然感到被摸腳，她謂：「我用咪講，點解有隻怪手嘅？唔好摸啦！」不過，泳兒稱返內地演出大致上經歷都是愉快，因現時吧場都已進步很多，會安排不少保安員駐場。

另外，洪卓立透露試過在酒吧騷被搣面和摸屁股，問他感受如何？他說：「畀女仔搣面無所謂，但畀男仔摸屁股就覺得毛管戙！」

港歌手輪住唱

內地酒吧騷大行其道，最吸引是歌酬高，表演時間短，其實只要肯密密唱，想賺錢買車、買樓絕非難事，難怪歌手輪住唱。

文：音樂組