靚佬湯不計前嫌 錫住Emily
影星「靚佬湯」湯告魯斯（Tom Cruise）近日與女拍檔Emily Blunt頻頻宣傳新片《異空戰士》（Edge of Tomorrow），雖然女方近日被爆多年前曾明言不欲與他合作，不過靚佬湯未有記仇，於訪問中大讚Emily為出色女演員，認真是「風度王」！
「靚佬湯」近日與Emily為《異空戰士》四圍飛巡迴宣傳，雖然連體拍住上，不過女方就被爆曾於2005年時講過，寧願做低酬勞的舞台劇演員，亦不願與靚佬湯拍戲做配角。而她日前受訪時就急澄清並明言：「我從來冇講過，咁講好恐怖！」又自爆拍攝期間，告知靚佬湯自己懷孕後，獲對方特別照顧和保護。而靚佬湯亦未見小器記仇，於另一訪問中，力讚Emily為出色女演員，認真有風度。
醫好愛女「公主病」
另一方面，「前湯嫂」姬蒂賀姆絲（Katie Holmes）自離婚後，不時單拖湊二人愛女蘇莉（Suri），又遊公園又學體操，遠離公開場合與童裝高跟鞋，力圖醫好愛女的「公主病」。而蘇莉前日放學後就與姬蒂到紐約公園享天倫，同場仲有幾個好友，只見現年8歲的蘇莉告別老積表情，頻頻笑不停盡顯童真，玩玩吓更跑到媽媽身邊扭抱，姬蒂抱起愛女時先密密傾，後來又冧爆咀面，餅印母女大晒溫馨。期間蘇莉見到一好友於草地喊爆時，即化身大姐姐氹小朋友，上前攬實對方及拖手安慰，非常可愛，多得姬蒂埋身輔導，小女孩最終亦平復心情。
姬蒂熊貓眼盡現
而日前有報道落實姬蒂將參演《The Woman In Gold》，加上早前兩部電影作品，今年有3部電影出爐，邊拍戲邊湊女似乎非常勞碌，難怪姬蒂當日於公園掛上一大對「熊貓眼」，一臉疲憊。
文：外娛組