王敏奕冧掂曾國祥 志偉准入屋
在電視劇《女人俱樂部》中飾少女版李麗珍而廣為人知的王敏奕，自承認與曾志偉兒子曾國祥拍拖後人氣急升，前晚先陪男友大方拖手出席活動，曾國祥謂好欣賞女友，並自爆現時很定性，令女友冧爆！王敏奕昨日又到澳門與「未來老爺」曾志偉出席活動，志偉更開口表示不排除邀王敏奕去家庭旅行。
前晚曾國祥與女友王敏奕（Venus）拍拖出席時尚活動。曾國祥大方介紹女友，並謂因與女友各自繁忙，所以寓工作於娛樂，拍拖出席活動爭取時間見面。問到二人是否感情穩定？他說：「好穩定，都拍咗幾個月拖，（定性所以公開？）我定性咗好耐同好乖o架！」
談到近日忙甚麼？他透露跟女友各自接拍一套電視電影，問到是否一起合作？他說：「我哋係分開拍，唔同導演，不過我都期待同佢合作，但又唔想太刻意！其實就算佢唔係我女朋友，我都會想同佢合作，因為我欣賞佢！」在旁的Venus聽罷即露出甜美笑容。那可有結婚計劃？他笑說：「咁快？我覺得慢慢啦，最緊要兩個人一齊開心，（見晒家長？）有見過，但未見晒！」言畢又搭着女友讓記者拍照，甚為恩愛！
未正式食飯
翌日，Venus與「未來老爺」曾志偉齊現身澳門，志偉指仔仔因工在身未能參加，更笑言：「佢派咗代表（女友王敏奕）嚟！（覺得佢點？）OK呀，最緊要佢鍾意！作為演員同新人都OK呀！（佢點稱呼你？係咪叫老爺？）老爺？叫我「老嘢」吓話？」志偉更指二人秘密拍拖無風聲，笑言收到驚喜，但雙方未正式食飯，問對方是否成功「過關」？志偉表示：「屋企每年都有家庭旅行，睇下佢有冇份出席啦！」代男友出席的Venus成為焦點，被問到會否參加志偉的聖誕旅行？她說：「年尾嘅事，會繼續努力！」
志偉被問到其監製的《女人俱樂部》步入結局篇，志偉表示：「好開心同唔捨得，難得套劇掀起咗熱潮，大家都興搵番啲舊同學影相。（落實咗開電影版？）仲未落實拍。（會如傳聞咁飛甩李麗珍？）飛唔到，一個都不能少！加人就會嘅！」
文：名人組