康城電影節早前圓滿閉幕，由紅地氈、首映禮，以至慈善或私人派對都是「裙」情洶湧的場面，星級造型師郭慶彬（Ricky）大讚Rosie Huntington-Whiteley着出人衫合一的最高境界，展現夏日女神感覺。反而莎朗史東（Sharon Stone）因一副太陽眼鏡破壞造型，功虧一簣。而鞏俐不讓外國女星專美，穿上黑色連身裙，展現出高貴優雅的氣質。
仿斗篷式設計（Scarf-like）近年興起，顧名思義是在服裝的後幅縫合一匹長度不同、輕重不同的質料，如雪紡或真絲的飄逸質料可營造出隨風飄揚美感，又或是長至拖尾的晚裝款式，這款設計激發起時裝設計師源源不絕的玩味創意，展現女性不同的型格與柔美。
黑白色本來好穩陣，但撞埋個娘味重嘅圖案，成個感覺變得俗氣，而且個妝又化到佢成個公仔樣，加埋個髮型又梳到佢頭尖額窄，真係冇乜貴格，搞到佢好老餅！
係典型紅地氈晚裝裙，唔算有特別驚喜，可以話件款式穩穩陣陣，出到大場面；不過佢上露下露嘅剪裁就輕易贏到焦點，如果佢梳番簡單直髮造型會更有時代感，依家有啲成熟老餅味。
薑真係愈老愈辣，全黑打扮一啲都唔悶，反而好有壓場感，半截長裙配襯透視恤衫，若隱若現效果又能凸顯到佢花樽身形，係性感優雅嘅典範。
杧果黃係好蝦人着嘅顏色，但佢超模骨架完全撐得起，好清新悅目效果，加埋佢健康膚色同把棕色秀髮，效果一絕，整個人衫合一嘅造型襯出夏日女神感覺。
條裙本身OK，本來着得唔錯，好得體，但副黑超累事，令整個感覺好奇怪，佢好想刻意營造超級巨星效果，但出嚟效果就差強人意，拖垮整件事，變得美感不足，騎呢有餘，認真多手！
尚算OK，唔算突出，靚又唔輪到佢，唯一可取就係裙款剪裁，着到佢身形線條同比例均勻，有拉長身段嘅視覺效果，望落好纖瘦。不過佢個nude妝撞落條淺色裙，顯得好蒼白嘅病樣，如果改塗紅色或櫻桃紅色唇膏，會更sharp醒！
著名星級造型師郭慶彬（Ricky）曾遠赴米蘭與巴黎時裝周，出席Max Mara、Sportmax、Chanel、Valentino、Gucci等品牌的活動，也曾被邀在中國時尚節目《美麗俏佳人》擔任嘉賓主持，現於電台擔任客席嘉賓大談時裝之道與配搭技巧，近年也被各大品牌邀請客串造型顧問，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位被肯定。