孔令政靠鄭中基贏口碑
香港新進導演孔令政（James）首部導演作品《第七謊言》，是懸疑、犯罪題材電影，請來演慣喜劇的鄭中基演出。James早前攜電影到洛杉磯試映，又到康城賣片，獲得不少好評，未來數月將陸續出席影展，大有機會像港產片《歲月神偷》般，挾西方好評殺回香港。
孔令政（James）於2009年在美國修讀完電影後回港，由於香港電影界不利寂寂無聞的新導演突圍，James用了四年才實現到他的導演夢。他拍處男作《第七謊言》時獲前輩協助，就邀得鄭中基、吳嘉龍及姜皓文等演出，結果在外地宣傳獲不少好評。
James受訪時說：「我攞住劇本周圍搵有資歷嘅電影人，自己搵監製，搵製片，直至搵到田雞（田啟文），佢話好鍾意個劇本，畀咗好多意見我，又幫我搵演員同幕後班底，好彩有前輩幫手，肯畀機會新導演嘗試，套戲先拍得成。」
用新器材減成本
最後雖然申請到香港電影發展基金，但款額有限，James謂：「每條數都好有限，逼自己用腦去控制成本，困難o架！套戲仲有鬧市同夜景，於是我放棄用拍開戲嗰種攝影機，改用一款輕型嘅機。起初我都懷疑部機嘅性能，但喺銅鑼灣人來人往，部機表現好好。」
談到作為新導演面對的壓力，James表示：「壓力係不斷湧現，喺有限環境下，要自己諗辦法調節，好感激幕後肯畀機會我試。（基金會除咗畀錢，有冇提供其他幫忙？）佢哋負責融資，聯絡方面有其他部門幫手。（發行遇困難？）安排咗10月上映，6、7、8月會不斷參加影展。新人面對嘅環境係困難嘅，但唔可以等人畀認同，相信理念就要堅持！」
文：影視組
攝：嚴偉國