泳兒性格慢熱 愛不主動
靠一把靚聲出道的泳兒（Vincy），在樂壇打滾八年終於來個全新嘗試，推出首張Hi-Fi大碟，以翻唱經典情歌為主。自言性格傳統、保守的Vincy，最大挑戰是錄音時要化作為愛主動的女孩，又透露原來其性格亦影響到她的擇偶條件，更大爆男友的外形其實完全不是她那杯茶。
首次推出Hi-Fi專輯《愛‧情歌》的Vincy，接受電台DJ李國能訪問時表示，全是因緣際會，她說：「因為上一張唱片有首翻唱劉若英嘅《後來》，出嚟反應好好，所以有信心今次做隻全翻唱碟，希望提升音樂層次，做隻好靚聲嘅Hi-Fi碟。」Vincy稱在揀歌過程中，從二百首歌內選出十首：「喺錄音室逐首試聽然後投票決定，最後先選出呢十首。」
十首歌全部以情歌為主，Vincy表示演唱時有相當難度：「好似主打歌《普通朋友》，新版本同陶喆版本有好大分別，我本身性格係比較被動，但首歌就要變成好主動嘅女仔。」自言思想傳統，即使現實生活中，亦不會主動出擊：「我覺得應該係男追女，唔係女追男，我係要慢慢培養感情嗰種人，比較慢熱，如果我唔識一個人好難有愛情感覺。」
由了解變為欣賞
談到現任男友亦是由日久生情開始，Vincy卻大爆原來初見男友時，對方的外形完全不屬於她杯茶：「我之前唔鍾意男仔留鬍鬚，覺得好污糟，而且有少少鹹濕。我鍾意男仔白淨皮膚好，又唔鍾意男仔長頭髮，所以初初識佢時，我覺得所有唔鍾意嘅嘢都喺晒佢度。」經過一段時間相處後，才慢慢對男友有好感，她說：「感情係慢慢儲番嚟，我哋成日一齊做嘢，日子耐咗了解到大家嘅個性，可以夾到，而且見到佢幫我整頭髮時好認真個樣，都好欣賞。」
攝影：秦健輝
髮型：Nick.L
化妝：Cyrus Lee
形象：Queenie Yu
服裝：Initialfashion
場地：美村日本料理
文：曹家誠