駱胤鳴愛意氾濫 周圍表白

組合「樂印姊妹」早前食住「我愛你」日子特別炮製新歌《520》,妹妹駱胤鳴笑言當日有不少男生向她表白,更以「好多、大把」來形容不乏追求者,還希望有朝一日可以同偶像台灣歌手黃鴻升講「我愛你」。

曾參加無綫《超級巨聲》的駱胤鳴早前孖親生姐姐駱胤樺組成「樂印姊妹」闖樂壇,兩姊妹性格極端,家姐內向少說話,細妹駱胤鳴健談外向,近日她們四出為新歌《520》宣傳,並坦言靈感來自5月20日:「係『我愛你』意思,希望大家多啲同心愛嘅人講。」

問520當日有否向心儀對象表白?駱胤鳴笑說:「勁表白,嗰日喺網上平台同歌迷互動,不停同佢哋講『520』。(有冇男仔同你講『我愛你』?)好多,身邊大部分都係男仔,希望有日可以親口同黃鴻升講。」怕醜的家姐駱胤樺則說:「會等男仔講,自己好少講『我愛你』。」

隱瞞被偷吻

駱胤鳴透露去年出席活動時,遭男舞蹈員偷吻,嚇得她手足無措:「大家一齊跳舞,跳完落台時佢錫咗我一啖,當時好驚唔識畀反應,只係同佢講Happy New Year!(冇下文?)梗係冇。」她怕媽咪擔心故未有告知:「怕佢以為我被輕薄。」

化妝、髮型:Stephanie@D-mop Beauty

服裝:UUU...SHOOOP

場地:Neway@港晶中心

文:音樂組

攝:嚴偉國