諸葛爆岐麟B愛攬女
久未露面的「薛王妃」諸葛紫岐，全副心機投放在兒子「岐麟B」身上，諸葛發覺只有半歲的「岐麟B」，音樂感極強，但卻不愛聽兒歌，只愛聽搖滾樂和hip hop，天生好動，還專揀女人抱抱。
現主力湊仔的諸葛昨日出席IPSA護膚品牌活動，同場還有名模Ana R.與師妹伍靜麗。諸葛一提起半歲兒子「岐麟B」就甜在心頭，她說：「囝囝半歲已經二十磅，係個重量級BB，之前我因為抱得佢多搞到腰痛，依家抱唔到，但阿仔好鍾意人多，啲人抱佢又唔怕陌生，特別鍾意女仔抱。」
「生唔生阿仔話事」
諸葛一輪嘴的說：「阿仔又好鍾意聽音樂，不過唔係兒歌，鍾意啲rock、hip hop，一聽到就不停手舞足蹈。（幾時追多個？）問阿仔意見先，佢唔畀，我唔會生，我好民主，對阿仔同老公都一樣。（驚唔驚冇時間理老公，佢去偷食？）唔會啩，呢樣要自覺，冇得成日睇住，如果佢咁做，我都可以做同樣嘅嘢。（以牙還牙？）如果淨係靠講係唔會明，同埋唔會感受到，要做先知個感受。（有乜御夫術？）唔理佢，畀多啲自由佢，愈唔理佢反而會令佢更加緊張。」
楊洛婷check男友定力
同場擔任司儀的楊洛婷，透露男友Dear Jane主音Tim最近為新歌拍MV兼做導演，她則在旁做「阿四」，她說：「我幫佢揀個靚模特兒，又搵靚衫，啲衫又要性感得嚟有少少透視。（你引佢犯罪？）咁當check吓佢定力囉。」楊洛婷被笑是全程監場，她說：「係幫手，唔係監場。（有冇酬勞？）佢第一次執導應該冇乜budget。」
文：名人組