嘉穎撞爆缸 楊怡笑Seven
鄭嘉穎日前為新劇開工時，不慎撞傷眉頭要立即入院醫治，幸好經診斷後證實傷口不深，不用縫針，昨日拍檔楊怡看見負傷的嘉穎即幸災樂禍笑說：「Seven Wing」，又指凡與她合作的藝人都會遇意外。
視帝鄭嘉穎、視后楊怡和陳展鵬等，昨日在無綫電視城為新劇《天眼》進行開鏡拜神。嘉穎到場時眉頭位貼上膠布，他說：「尋日（前日）開工時唔小心撞埋門框，工作人員同我講，我先知流血，之後即刻入醫院，好在傷口唔深，唔使縫針。」
化妝遮傷口
問嘉穎會否擔心破相？他笑言：「我又唔係行靚仔路線，相一早破咗，之前打波，塊面縫咗五針，拍劇集《葉問》時，眼尾又縫咗十針。」他笑言今次若傷口打橫，還可扮皺紋，現在傷口打直又礙眼，所以可能因不連戲，需要休息兩、三天，之後會靠化妝遮掩再開工。
楊怡見嘉穎受傷，笑指他是「Seven Wing」所致，她說：「見到佢以為造型咋，可能佢粗心大意，唔知係咪收工瞌眼瞓。大家今年都要小心啲，好多事發生。」
幫展鵬擋災
楊怡又自爆與她合作的藝人均會發生意外，早前馬浚偉拍《守業者》亦弄傷鼻樑，她說：「都係唔好講，費事冇人敢同我拍劇。」同場的陳展鵬劇中與嘉穎是兩兄弟，他笑說：「可能嘉穎幫我擋咗，之後會同監製講有動作戲唔好同楊怡拍。」
文：影視組