Fiona認煩獨愛交心男

薛凱琪（Fiona）昨日與劉心悠一起出席adidas活動，Fiona談到早前被影到上男友人家，傳新戀情即否認說：「嗰日我做完活動就飛奔去搵我個朋友同我助手。（係咪拍拖？）唔係，係我音樂上嘅合作夥伴Fergus Chow，佢屋企有個Home studio，我啲廣東同國語專輯都會同佢合作寫好多歌，我哋係好朋友。我都想宣傳下，佢係好好嘅監製，識作曲、彈鋼琴同低音結他。（點解你哋撻唔着？）如果我要識一個男朋友好煩，要傾好多年偈，要好深入了解對方先得，我同佢好少傾私事。（再傾幾年你唔細？）係呀，人哋可以用嗰啲時間追10個仔，但如果咁都等唔到即係唔係咁鍾意我啫。（生BB？）依家科技40幾歲都生到，BB係上天畀嘅禮物。我暫時未有對象，佢絕對係我嘅兄弟。」