嘉穎一哥歸位 展鵬坐歪
鄭嘉穎、楊怡、陳展鵬、高海寧、楊秀惠等昨日在將軍澳電視城為新劇《天眼》試造型，近年在大陸狂賺「人仔」的嘉穎兩年半後再拍無綫劇自然是「一哥」歸位，就連近期頻頻擔任男主角的陳展鵬也要坐歪降呢任「男二」。
鄭嘉穎在新劇《天眼》中擔任男主角飾演偵探，與楊怡有親熱戲，他笑謂只錫一次，但劇中會不斷重播，十分抵用。問嘉穎咀楊怡是否要問准她的好拍檔馬國明？他笑說：「點解要問馬國明？唔係要問大隻仔（羅仲謙）咩？」有指嘉穎日前在餐廳巧遇「師母」戴思聰太太時掉頭走，他說：「很不幸司機畀我睇咗段報道，只可以答，好遺憾可唔可以唔用嗰張相，令人好費解，要回應嘅好多年前都回應晒。」
末到傾約時候
至於陳展鵬兩年沒演過奸角，覺得有新鮮感，角色「披着羊皮的狼」奸到出汁。講到有指陳展鵬向無綫獅子開大口傾續約，他笑說：「報道內容亦很假，點為之大口？點為之細口？公司佢嘅其制度，自己開心就得。續唔續約並唔係大問題，自己會留喺公司拍劇，都未到傾約時候，唔使急住講條件，其實每個演員都希望雙贏。（改簽部頭約？）未諗到呢個問題。（有指同事眼紅你？）係咪拍劇捱到眼紅呀？」
期待咀高海寧
楊怡劇與嘉穎及展鵬譜三角戀，但楊怡反而期待與高海寧咀戲，因是首次錫女仔。提到羅仲謙表示母親節會送禮給楊母，楊怡說：「我會同媽咪飲茶同送花，（對羅母有咩表示﹖）會禮貌式短訊對方，或者之前有時間再同佢媽咪食飯。（兩家人一齊食？）唔係咁嘅，又唔係太熟。」高海寧透露劇中原本與洪永城有親熱戲，但聽聞最後取消了，她笑說：「我好保守，可避免就避免啦。」 採訪：影視組