龔嘉欣姚子羚同居似熱戀

龔嘉欣：龔　

姚子羚：姚

嘉欣（右）與子羚情如姊妹，嘟嘴擺甫士。

子羚慶生，嘉欣攬住咀。

cool爆vs卡娃兒

龔：以前我哋同劇但冇乜對手戲，見得多大家都「喂」嚟「喂」去粗聲粗氣，之後拍《我的如意狼君》做你妹妹，同你討論劇情咁就close咗。

嘉欣（右）與子羚齊齊玩自拍。	拍劇集《我的如意狼君》，嘉欣（右）與子羚不時討論劇情。	嘉欣被爆鍾意着短褲仔喺屋企行來行去。

姚：起初覺得你係好sweet嘅女仔，眼大大、笑起嚟都好甜，所以覺得你應該係kawaii路線，但相處落性格都男仔頭，雖然你冇我咁極端，比我多番啲小女孩特質。

龔：我就覺得你係好cool嘅女仔，識落先知你咁男仔頭，愈識就愈見到你硬朗嗰一面，同你溝通好簡單直接。

姚：有啲位你幾細心，有時會提我記住帶嘢，仲會煮嘢畀我食，喺生活上幾照顧我，真係好女性化。

龔：可能我當咗你係男朋友啦，哈哈，喺精神上你都幾照顧我，你性格比較成熟，所以好多嘢我都會聽你意見。

姚：你同家人感覺唔同，我哋平日都會以禮相待，so far同你都一拍即合，家務上大家都好自動波，大家都想住得舒服。

龔：有人話「相見好同住難」，但我哋又出奇地夾，好多嘢好似唔使講咁，又唔使列晒啲規條，好在我哋都鍾意乾淨，感覺都幾似情侶。

姚：你啲內衣褲都係我幫你摺，不過你都會買底褲畀我，新年仲特登買紅色，哈哈。我哋好多嘢都好近似，護膚品都共用，唯一唔同係衣着，我打扮型啲，你就女仔啲，所以好難撈亂着，但有時你都會幫吓眼襯衫。

閨房講仔 愛分享

龔：我哋真係晚晚都傾偈，唔知點解收工返嚟乜都講，講吓嗰日發生嘅嘢、遇到嘅難題。

姚：因為我哋唔係日日都見到面，返工時間又唔同，就想爭取時間傾偈，傾完第二日都舒服啲。

龔：我覺得咁樣好好，一日裏面開心、唔開心嘅嘢都好似喺夜晚丟低咗。

姚：有時我都會分享愛情經驗，年資上我都大過你，應該我會多啲經驗，你都知你多人追o架啦，我會好好幫你選擇一個好好嘅伴侶。

龔：每次問你覺得個男仔點，你都會分析得好詳細，始終你遇嘅人多過我，所以我都會聽你話，有時自己身在其中，有啲嘢我未必睇到，作為一個了解我嘅人，你好知道我需要啲乜、鍾意啲乜。

姚：追我哋啲男仔都唔同類型，鍾意你嗰啲唔會鍾意我，想識你嗰啲就會搵我，身邊嘅朋友都會叫我介紹你畀佢哋識，我都希望你搵到個男仔好好哋，跟住結婚生仔，始終朋友唔可能住埋一世。

龔：我諗你都就快結婚o架喇，你要離開我都會唔捨得，我都想你搵到個好錫你嘅老公，不過我哋嘅感情唔會因為結婚而變。

姚：你以後住隔籬屋咪得囉！第時要「分居」我都會懷念，就算依家我未必成日留喺屋企、同你一齊，我都好掛住同你煮飯嘅日子。

各有習慣互相影響

姚：我哋好似冇嗌交，反而有好多笑料，成日打爛嘢好論盡，試過有次打爛你隻杯，嗰刻大家都dead air，互望，然後笑咗好耐。

龔：咪係囉，你成日鬧我！

姚：係你成日着條短褲仔、好鬼sexy咁喺屋企行嚟行去，有時冇拉窗簾叫你小心啲啫，我費事隔籬屋見到你咁性感，我都有啲位幾麻煩。

龔：你唯一嘅壞習慣係唔熄燈，但環保方面你都改變咗我，我依家會將垃圾分類，以前我冇呢種習慣。

姚：你就好鍾意照顧人、令對方開心，我喺你身上都學到啲嘢，雖然你唔係好大個，但都比較偏向成熟，喺處理日常生活事情上面都幾成熟，尤其係程序上嘅嘢，我有選擇困難症，太多嘢會唔識揀，所以呢樣嘢我想學習。

龔：其實我會list畀你，plan A、plan B等你自己揀，但我覺得你可以靠自己能力解決問題、硬淨啲，呢個都係我要學習。

姚：我都有低能一面，上次喺蘇梅酒店房見到支嘢，我就跳鋼管舞畀你睇，好無聊。

龔：我仲幫你拍埋片、影埋相，我已經習以為常o架啦，哈哈。

後記：

外表斯文靚女的龔嘉欣和姚子羚，合體後零舍搞鬼兼合拍，拍照時兩女攬頭攬頸，默契十足，儼如熱戀中的小情侶。鏡頭外，子羚的性格不拘小節，細心的「女友」嘉欣不時提點她整理妝容及服裝。拍單人照時，二人又會用手機幫對方留倩影，一有空檔便爭取時間，「港女」上身黐住瘋狂自拍。最有趣的是原來「同聲同氣」的她們，私下都是以家鄉話——台語來溝通，受訪當日亦雞啄唔斷，兩位「美眉」甚至會在家中勁唱台語老歌，認真搞笑。

文：影視組　

攝：李柏儒　

場地：Full House Signature

服裝：2068

化妝：Sammy Lam @ zeal.image

髮型：Bowie Lo @ fifth salon（龔嘉欣）、Taylor Wan @ hair corner（姚子羚）