傅穎無約一身輕唔「嫁」住
慘遭負面新聞接二連三打擊的傅穎，被傳遭經理人公司星皓解約遺棄，再爆她與內地男星撻着，繼而向「冤家」鄭中基抓撈。傅穎否認坎坷慘情，認為遭人刻意中傷，近年默默在內地拍戲掘金，毋須抓撈搵食，更高唱唔「嫁」住，毋須太快覓經理人。
近年在香港娛樂圈沉寂了的傅穎（Theresa），轉戰內地市場，一口氣拍了兩部電影及三套電視劇，本月中她會到上海接拍一部新劇，對《好報》昨日踢爆麻煩多多的她被星皓主動提出解約，Theresa昨日接受專訪時說：「我同星皓嘅合約3月底滿咗，大家係有共識和平完約，臨走大家都有攬吓。」她強調與星皓合作愉快，大家仍有聯絡，4月星皓在北京舉行了一個派對，即使她約滿也有出席。
客串玩兩日
Theresa被形容為窮途搵「冤家」鄭中基（Ronald）抓撈，她笑說：「有一樣寫得啱，比起以前我冇咁宅女，依家會多咗同朋友見面食飯，冇話抓唔抓撈。」
日前Theresa為鄭中基及導演陳嘉上的新片客串演出，她說：「我同Ronald、陳嘉上合作過兩部戲，大家都有聯絡，陳嘉上打畀我叫我過來玩兩日囉。」對《好報》踢爆她與內地員男星付辛博密秘撻着又閃分，她形容這緋聞無厘頭，並說：「好得意，我哋係朋友，的而且確成日合作，但係朋友啫。」
遭刻意中傷
回復自由身的Theresa暫無意簽約經理人，她笑說：「唔想約滿咗，即刻又簽，每簽一個經理人好似嫁咗一次，我唔想太快做一個決定，需要時間去物色，近年我主力喺內地發展，都好多朋友幫我手。」對於不停有負面新聞，Theresa大感無奈，她覺得遭人刻意中傷，她說：「我唔係嬲，係唔明白動機係咩，有一樣我唔驚嘅係識我嘅人知我工作係點，尤其係我嘅工作態度，呢方面我好有信心。」
文：音樂組