顏卓靈M痛爆「髮」炸走男友
20歲影壇新貴顏卓靈（Cherry）早前提名金像獎影后，演技備受肯定，她亦成為廣告界新寵兒，身價不斷攀升！最近她在調理經痛的飲品廣告中盡情發揮諧星天分，以誇張形式演繹女人的每月之苦，廣告中她原本是甜美女友，但因抵不住經痛突然「爆Seed」發老脾，現場有爆炸、冒煙及吹風機加強其氣勢，Cherry的怒髮衝冠兼張牙舞爪，嬲爆打爛碗碟及向身邊人掟蛋糕，嚇得男友與舞友紛紛拔足逃跑，她由兇惡嬲怒到掩肚痛苦樣完全交足戲，效果超爆趣！
身體差要調理
為配合不同故事及角度，Cherry需不停發難，她每次都非常入戲，更自動波加戲咆哮，令要扮驚的其他演員都忍不到笑而狂NG！據知，廣告商非常滿意Cherry表現，將「包起」她繼續合作。
對於「女人之痛」，Cherry表示她亦身受其苦，其時會面色欠佳及脾氣變差，難怪她演繹得如此得心應手：「可能人大咗身體差咗，開始出現經痛問題，手腳好冰冷，有時痛到乸埋口臉，脾氣都差啲，會叫身邊人唔好同我講嘢住，希望可以快啲返屋企休息，所以都要飲啲健康飲料調理下。」
文：影視組