林欣彤甩拖解放醉到嘔
林欣彤（Mag）舊愛羅孝勇被爆搭上新歡後，另一邊廂「盛女」Mag就自爆做醉娃「劈」到嘔兼不省人事，更急與對方斬纜斷情絲，實行要自我檢討搵新男友，擺明再見不是朋友。
林欣彤（Mag）去年與羅孝勇（Sheldon）分手後，雖有傳她秘戀同門師兄陳家樂，可惜最終都只是煲無米粥。近日舊愛Sheldon被指搭上靚女新歡後，Mag前晚即來個性感大解放「示威」，她與無綫藝人姚兵、陳國峰為酒吧騷擔任嘉賓時，以Tube Top配超短熱褲上陣，大晒香肩滑腿，在台上繼續晒巨肺唱功，表現high爆！
但原來Mag的肺容量與酒量不成正比，甚少夜蒲的她自爆曾試過醉到嘔，問到是否因為失戀緣故？她說：「唔係呀，係成堆朋友畀點着火嘅酒我，好得意咁，佢哋推咗我去飲，話唔想支飲管熔。（酒後亂性？）只係嘔，瞓到不省人事，但有知覺，冇斷片。」
直認少聯絡
提到Sheldon被指與新歡買餸煮飯仔，Mag大方送上「最後祝福」：「係咩？佢有新歌就知。真係嘅？祝福佢囉。」問二人可有保持聯絡？她就極速劃清界線說：「《巨聲2》有個group chat，佢有share新歌MV，但就冇乜聯絡。」回復「盛女」生活的她自嘲冇人追，笑言要開會自我檢討：「點算，冇人追，我有咩問題？係咪要開個檢討會呢？」
至於同場的陳國峰就直言不擔心有女狂迷趁機抽水：「可能見我身形魁梧，唔敢抽水，但好多粉絲都係斯文嘅。」
文：音樂組