葉念琛夢境成真 任許冠文捽
導演葉念琛的新作邀得「一代笑匠」許冠文重出江湖，火拼「新一代搞笑高手」王祖藍，葉念琛指能親導偶像演戲很難忘，更直言被對方「捽得好犀利」，三位高手過招定必火花四射。
葉念琛執導新片《Delete愛人》邀得「一代笑匠」許冠文出山，與王祖藍大放笑彈，葉念琛坦言跟許冠文合作如夢境成真，同時又直言壓力大、好緊張：「我係睇佢戲長大，好奇妙有日佢成為我嘅演員，見到佢喺個Mon入面好激動，可以親自導演佢，對我嚟講好難忘。」
千方百計打動笑匠
深知前輩對劇本甚揀擇，事前葉導也為電影做足準備，並千方百計托人約見許冠文，終以誠意打動偶像重出江湖：「原來佢同仔女都睇過晒我啲戲，好興奮、好開心，許冠文話個女以為我搵佢配鄧麗欣。佢都好欣賞我嘅電影風格，起碼有第一步的好感，到最後應該係個故事打動到佢，因為呢種狂想曲故事少喺香港出現，整個拍攝過程都好順利。」
他指許冠文在拍攝時提出許多問題，又笑謂被對方「捽得好犀利」，葉念琛說：「呢一輩嘅演員對劇本理解、演戲要求都好有自己睇法，我同自己講要不斷畀佢捽到，呢個就睇自己有冇拍戲、創作嘅能力。喺佢身上，我睇到佢嗰輩對戲劇嘅品味，有時後生仔係粗枝大葉啲。」
讚王菀之獨一無二
今次祖藍擔大旗不再扮女人，葉導讚他聰明地加入自己的創作入角色，而其另一驚喜則是王菀之，葉念琛表示看到對方的喜劇感，並期待下次再合作：「佢嘅語氣、節奏感好奇怪，好獨一無二，佢嗰種神經質無人可以媲美，拍完呢套戲都叫佢唔好放棄演戲。」
文：影視祖