張頴康扮單身 引嘉琪落疊

無綫藝員梁嘉琪及張頴康相識多年，在劇集《愛我請留言》中還是首度飾演情侶，劇中阿康飾演嘉琪的夢中情人，他們笑言現實中兩人感情猶如兄弟，因此演情侶既有默契亦有難度，怕會忍不到笑，阿康笑說：「埋位前唔敢玩咁癲，驚冇咗情侶嘅感覺，所以嗰排我都冇提起自己老婆（主持麥雅緻），費事佢覺得鍾意咗個有婦之夫。」

嘉琪表示與阿康以往已經常談論演技，因此今次演得分外安心，她說：「我哋好信任對方，就算好close都唔尷尬，劇中有好多浪漫場口，幕後睇番都話好sweet！不過佢有咁大個老婆喺度，一定唔會過電。」原來嘉琪是第一個得悉麥雅緻有喜的友人，可見他們果然勁老友！阿康說：「佢偷睇到我睇大肚婆食譜，但嗰陣未夠三個月唔講得，我講笑話要殺佢滅口。」

梁嘉琪為了演好角色，刻意把頭髮剪短。

梁嘉琪作勢毆打張頴康，貫徹她在劇中惡女的一面。

揣摩惡女形象

今次嘉琪的角色「宋柳娟」性格鮮明發揮甚大，面對飾演內地人的傅嘉莉經常擺出不屑表情，對好友黃翠如則甚有義氣，拍拖時更會變得非常情深，觀眾大讚她演出投入討好。嘉琪表示以往多數演斯文弱者，這次角色有刻薄兇惡一面，事前她花了不少工夫揣摩，更將長頭髮剪短望形象更爽朗，她笑說：「戲入面我成日睥住人，眼珠都就嚟跌，但導演仲嫌唔夠，令我逼自己要再惡啲，搞到我拍完都慣咗講嘢冇尾音。」

梁嘉琪服裝：PENNYBLACK

髮型：Ron Ng＠HH hair.nail

文：立影

攝：李柏儒