碧咸澳門受集 阿倫簽名波衫晒命

【羅宛君澳門直擊】「萬人迷」碧咸前晚現身澳門即成為集郵對象,先被好友李玟捉住自拍,連樂壇校長譚詠麟都帶埋波衫「追星」,成功索簽名的阿倫昨日即穿上球衣Show Off,還笑言對方不敢就曼聯換領隊發表意見。

俘虜萬千少女的碧咸前晚與韓國組合EXO-M、李玟(CoCo)、譚詠麟、陶喆、孫楠、吳建豪等人出席澳門舉行的《全球華語榜中榜》頒獎禮,魅力超勁的碧咸成「集郵」對象,先後與CoCo、吳建豪及阿倫合照,成功與「萬人迷」合照的三人火速將相片放上網晒命,阿倫笑言人生首次破戒,於公眾場合找人簽名,更獲對方邀請一齊飲酒。

頒獎畀CoCo

CoCo感激好友碧咸百忙中抽空到場頒獎給她,但可惜趕住走未能相約對方食飯,阿倫表示在舞台邊巧遇碧咸,大家點頭打招呼,阿倫自爆說:「聽講話一陣有派對,即問工作人員佢去唔去,如果佢去我就去。」原來阿倫早有準備帶埋球衣參加派對,並獲碧咸簽名留念。

另外,阿倫昨日穿上碧咸親筆簽名波衫出席活動,問到有否與碧咸傾曼聯換領隊一事?阿倫笑說:「有問呀,佢唔敢答。」由於阿倫曾與碧咸老婆Victoria出席上海活動,他說:「我有同佢講見過佢老婆。」隨即大讚對方:「好欣賞佢做球員時嘅態度同精神。」