呂慧儀畀「蟹籽」踢 似腸抽筋
「長腳蟹」呂慧儀已懷孕四個月，透露老公黃文迪不停叫她進食，令她擔心變成虎背熊腰，體重暴增、胸部升cup！不過印象最深是腹中「蟹籽」踢她時，感覺似腸抽筋。同樣佗B肚大如籮的名模趙嘉懿，預產期為6月初，重了四十磅的她依然面尖尖，兩位星級孕婦得天獨厚，實在惹人艷羨。
懷有四個月身孕的呂慧儀（阿蟹）昨日穿上四吋高跟鞋出席活動，還在台上表演民族歌舞。預產期在9月的她，透露肚內的「蟹籽」BB很活潑，已感受到BB踢她，更笑言BB第一次踢她時，感覺像腸抽筋。
掃描怕「食詐胡」
阿蟹表示暫時未知BB性別，將於下星期照超聲波：「希望佢合作啲，啲手指唔好亂放，唔好食詐胡。（想生仔？）我之前想生女，因為可以扮靚，不過其實生仔都可以扮到好靚。同埋可以同朋友啲囝囝一齊識女仔，諗起都開心，不過其實仔定女都冇所謂。」
她又透露老公黃文迪不停叫她進食，令阿蟹擔心自己變得虎背熊腰，她說：「重咗好多，我都唔敢上磅。（上圍升咗兩、三cup？）都有，啲人唔係恭喜我有咗，係恭喜我升cup！」
趙嘉懿肚巨面尖
至於名模趙嘉懿（Carrie）的預產期是6月初，肚大如籮的她已肥了四十磅，但依然面尖尖：「好多人都問我係咪雙胞胎，依家個肚咁大，開始覺得重，行路時要搵隻手托住。」兒子Marcus也很期待妹妹出世，經常會攬着及親吻Carrie的巨肚。她說昨日是Marcus的生日，原定上星期四為他搞生日會，可惜因他發燒要取消，她無奈說：「我仲預備咗個五磅嘅生日蛋糕，四十隻朱古力兔仔畀小朋友，依家惟有延期舉行，同時改喺屋企搞小型生日會補數。」
文：名人組