莊思敏簽王子涵「報仇」

父親是馬來西亞拿督的莊思敏，出身富裕，但從不靠屋企，來港做模特兒超過十年，近年莊思敏逐步轉型，除了拍戲還投資時裝生意、搞美容學校，最近則與幾位友人合夥開經理人公司，自掏腰包六位數作投資，旗下藝人以王子涵和模特兒何紫綸（Ann）較為資深，其餘都是新人。

「三不」政策

莊思敏表示不會要求藝人着少件衫拍照及拍性感寫真，亦不會阻止藝人結婚生仔：「藝人要有乾淨嘅關係，唔可以做『小三』，破壞別人家庭幸福嘅嘢唔可以做。」同是模特兒出身的Mandy Lieu亦開模特兒公司，莫非打對台？她說：「世界大同，佢公司以外國人為主，各有各做！」莊思敏與Ann相識十年，兩人個性一凹一凸，她主力向外，Ann當模特兒之餘還會擔任美容和儀態導師，指導其他藝人。

莊思敏（右三）率領公司旗下藝人見傳媒。

王子涵（右）、何紫綸成為同門。

對於簽Ada，莊思敏直言雙方很有緣分：「我以前簽佢老竇，依家我簽番佢個女。佢以前做過幕前，之後去咗讀書，其實佢老竇咁多網絡，可以有好多公司揀，但佢想靠自己。」還打趣說：「以前佢老竇對我唔好，依家搵佢個女有仇報仇，講笑啫！」

紅畀爹哋睇

24歲的Ada跟莊思敏簽下六年賣身契，笑言搏盡「不成功便成仁」：「我諗咗兩晚，決定咗先同爹哋講，反正屋企唔係等我開飯，可以自私得起。我講想簽經理人，爹哋問我簽邊間同埋老闆係邊個，就話：『你鍾意啦，都大個女，總之有乜嘢自己負責任。』」何不簽約父親旗下？Ada說：「當年爺爺（王天林）都將爹哋交畀導演楚原，冇教過佢嘢，依家爹哋照辦煮碗，唔會提攜我，今次個機會係我自己搵番嚟。爹哋仲話，就算我喺佢部戲有幾紅都冇用，喺人哋部戲紅先有料到。」

場地：Ista Bar and Grill