陳庭欣楊秀惠爆笑姊妹淘
無綫女藝員楊秀惠及陳庭欣（Toby）同樣選美出身，相識多年又齊齊加入主持行列，自然有說不完的話題，講食、講扮靚、講工作，笑料百出！秀惠踢爆Toby總是帶大量零食出街，但食極唔肥令人羨慕；Toby則讚秀惠是「扮靚指標」，會經常偷睇其微博取經。
楊 = 楊秀惠 陳 = 陳庭欣
初相識多回憶
於2010年贏得港姐冠軍後，Toby第二個出埠飲食節目便是與秀惠到馬來西亞，因秀惠是馬國地膽，全程由她帶路，期間發生不少笑料，兩人亦因此成為好友。
楊：當年我哋主持飲食節目，主持模式好癲，我哋自己諗故事玩角色扮演，諗番都好搞笑！
陳：當時係冇稿，導演見我哋平時都係咁，就畀我哋自由發揮！嗰個trip我好放心，因為秀惠好熟路，好多事都靠晒佢。
楊：記唔記得有日落過雨，拍攝地點滿地泥，我哋成身濕晒，但當日一定要拍完個take，我哋仲笑住扮火車接力講對白。
陳：係呀！因為個樹林出產橡膠，濕氣好重，結果成腳都係泥，感覺都幾核突！
楊：另一次我哋去市集拍攝，見到有人表演玩好大條蛇，導演提議我哋玩埋一份，想捉你過去時，竟然唔見咗人囉！
陳：我勁驚呀！一見到咁大條蛇就匿埋，去咗附近涼亭。
楊：摸蛇我OK喎。
陳：你係大膽啲，我細蛇都唔得，仲要咁大條！佢哋叫我扮見唔到，點扮呀？
楊：回想起當時大家成日整蠱你，扮鬧你，你就狂問點解，係一個好得意嘅女仔。
事業旺互欣賞
相識數年，兩女事業漸上軌道，Toby開始做大騷司儀，秀惠除了拍劇，主持的女性節目《姊妹淘》大受歡迎，難怪Toby讚她是扮靚達人！
陳：你入行早過我，我喺電視上認識你，你選華姐嗰陣，我都有睇，當時已經覺得你好靚，但你多數講普通話；到真係相識咗，發現你啲廣東話好好，而且係好開朗嘅女仔，可能係馬拉人熱情啲。
楊：幾年前覺得你好細路女，但已經覺得你有主持天分！之後間中都有合作，依家嘅你成熟咗，執生技巧好咗好多！我成日睇你啲飲食節目o架！
陳：我個《越夜越美味》，同你個《姊妹淘》係連住播。
楊：係囉！我有時想睇自己，又會睇埋你！哈哈！
陳：你主持《姊妹淘》都成兩年，我當正你係扮靚指標喇！成日睇你微博，睇你分享。有次微博見你用大髀夾住隻米奇老鼠公仔，令我好好奇！
楊：係練緊肌肉o架！其實我周圍見到乜都會聯想到用嚟做運動，不嬲鍾意研究扮靚、瘦身，咁啱呢個節目發揮到興趣，所以好開心！
陳：我就比較懶，唔會周圍去搵資料，但會睇節目，見到啱就學囉！
食極唔肥稱羨
去年Toby將興趣變成副業搞日式餐廳生意，獲秀惠大讚聰明女強人，但又踢爆Toby總愛吃不停，卻食極唔肥。
陳：我覺得我哋幾有緣分，次次見面都好多嘢講，依家仲同一個經理人，最近《單戀雙城》亦有份拍，不過就唔同線。
楊：希望可以同你演兩姊妹啦，我覺得我哋似樣o架！
陳：我似家姐？
楊：唔係！你係幾活潑嘅妹妹。
陳：我拍劇機會少啲，所以會請教周圍嘅人，包括你！之前睇你演《金枝慾孽貳》，啲稿好深好難背，我都好佩服。
楊：因為監製喺度，而且時間都幾趕，大家好專心，咁你依家自己做生意，開日本鐵板燒餐廳，係女強人喇！其實我覺得你好聰明，做藝人又有自己生意，成家人咁團結一齊搞，所以第時會請教你，香港做生意真係唔容易！
陳：我最欣賞你咁獨立，香港冇親戚，都決定一個人嚟發展，令我諗番我十幾歲自己去外國讀書咁，我都只係去幾年，但你嚟發展事業，要好有決心。
楊：我依家好鍾意香港，當正係我第二個家喇！喺度投資都冇問題，希望有朝一日做到老闆娘，如果係嘅話，都係同扮靚有關，我諗個個女人都鍾意。
陳：我鍾意食，所以就做食嘅生意。
楊：你真係食極唔肥！我近幾年瘦咗，但成日畀人話唔食嘢，你就keep住食零食！你個袋一定收埋啲嘢食，成個百寶袋咁，有時拍嘢幾個鐘，想食嘢就會問你。
陳：我見個篋咁多位，咪塞啲零食入去囉！平時開工都有帶糖，有時口痕o架嘛！又可以同大家分享。
後記：熱情之吻
秀惠及庭欣一個華姐出身一個港姐冠軍，性格都率直熱情，兩人雞啄唔斷，拍照時又不計形象攬頭攬頸，期間小記要求她們親密合照，庭欣即嘟嘴索吻，秀惠被嚇一嚇後很快作出配合，嘟嘴回敬，兩人又模仿周星馳電影《喜劇之王》的經典托下巴甫士，令現場笑個不停！