許冠傑熱情哂肌 官恩娜任咀
「歌神」許冠傑（阿Sam）前晚在紅館開騷，他在台上笑言忘記拉外套拉鏈，乘機晒腹肌。他貫徹熱情作風向歌迷送吻，並大讚擔任嘉賓的官恩娜（Ella）人靚聲甜，合唱完後又向女方送上「神之吻」。
阿Sam一連三場在紅館舉行的「What a Wonderful World 2014演唱會」前晚正式開鑼，他穿白色閃燈太空衣造型邊唱邊空降舞台，之後他脫去燈泡外套大晒腹肌。阿Sam笑說：「我都唔知冇拉拉鏈添！」然後他走到台邊與歌迷握手，更熱情與歌迷咀嘴。他謂：「今晚真係熱情如火，咁快開始握手錫錫，成晚點算呀？」期間有女歌迷竟衝上台又攬又咀偶像，阿Sam表現受落。
又靚又好聽
擔任嘉賓的Ella穿白色露背長裙、以漫畫《風雲》女角楚楚造型出場。她與阿Sam合唱《印象》，獲對方讚唱功好聽。阿Sam說：「10年前我睇電視見到一位唱歌非常好聽、非常靚嘅女仔，所以我邀請咗佢做我2004年『繼續微笑演唱會』嘅嘉賓。10年後佢唱歌又好聽咗又靚咗，我又再請佢嚟做我嘉賓。」之後兩人合唱《常在我心間》，Ella換上短裙騷索腿與阿Sam起舞，最後阿Sam送上「神之吻」給Ella。
演唱會中段，阿Sam向去世的「香港演唱會之父」張耀榮致敬。他謂：「張生對香港樂壇嘅貢獻功不可沒，所以我為佢送上呢首歌向佢致敬。」接着唱出《每當變幻時》，螢幕隨之播出耀榮叔與阿Sam及其他歌手藝人合照。而阿Sam與兒子懷欣、懷谷及徒弟Justin亦有份獻唱，之後鄭欣宜出場，與阿Sam合唱《父母恩》。另外，阿Sam還出動懷谷太太Ida獻聲，大讚新抱仔cute兼唱得好。
Encore環節，阿Sam穿上最愛的豹紋西裝，之後又給歌迷點唱環節，歌迷出動巨型貓紙給偶像跟住唱，阿Sam足足唱了13首歌才完場。
文：音樂組