林超賢自我隔離玩憂怨

導演林超賢執導《激戰》獲4千4百多萬驕人票房,他隨後「轉口味」,開拍英皇電影《魔警》由激情變沉鬱。林導坦言起用吳彥祖(Daniel)是情意結:「佢99年啱啱出道時,大家其實合作過一次。今次再碰頭大家都成熟咗,想將多啲嘢放喺佢身上。」而張家輝首肯演「綠葉」,當事人獲邀時也不禁問句:「點解要我做?」原來林導睇中家輝眼神的殺傷力:「佢唔使殺人都令人望而生畏,我咪同佢講『係得你咋。』」

除Daniel為投入角色,找心理醫生求助外,林導背後亦付出不少:「有日我突然租咗間office附近apartment嚟住,不見天日咁度橋,覺得自己似拍緊鬼片一樣,屋企人擔心我失咗蹤囉。」

另外,《魔警》獲選為台灣金馬奇幻影展閉幕電影,林導昨日現身台灣,對作品能夠為影展畫下句點深感榮幸,更在放映後與觀眾分享拍攝心得。