吳彥祖執念成魔 帶老婆出走
演員吳彥祖（Daniel）在英皇電影《魔警》中飾演精神分裂的警察，他坦言拍這部電影很辛苦，為代入角色「收埋自己」，連回家後也默不作聲，忽略了當時懷孕中的太太，因而拍畢後，即飛到南非旅遊抽離角色。
Daniel坦言今次的角色，難演在整套電影都演內心戲：「我嘅角色係個一直循規蹈矩的警察，細個做錯事爸爸就打，大個咗，自己做錯事都會用皮鞭打自己，久而久之就變成一個內心好抑壓嘅人！」他表示當初知要演這角色時，早已有心理準備，接下來幾個月都要收埋自己，更特意與患有精神分裂的患者見面，了解患病過程，他說：「其實精神分裂唔代表多重性格，當時我為咗更了解角色，搵咗一位已康復得七七八八嘅精神分裂患者，問佢嘅經歷，患者喺一位官仔骨骨嘅上班族，一直有幻聽，但一年後先睇醫生，同佢傾偈過程中會明白到佢點解咁掙扎！」
禁傾閒偈眼光光
導演林超賢為了令他投入角色，原來也花了不少工夫！Daniel說：「我都係拍完先知，原來拍緊嗰時導演叫所有工作人員唔好同我傾偈，現場又放啲好沉重嘅音樂，嗰段時間成個人變得好內向，好孤獨，情緒就好自然出嚟，甚至收工返到屋企，我開着部電視望住，完全唔知電視播緊咩，又無同太太傾閒偈！」Daniel拍《魔警》時，正是太太Lisa.S懷孕四個月，他表示拍畢電影後很內疚，認為太太懷孕最需要丈夫的關心及陪伴，但當時的他卻因工作而忽略對太太的照顧，因此拍畢後第二天，他即與太太飛到南非旅行一個月，轉換環境兼好好休息，不消一星期就抽離角色。
為仔女慎選角色
Daniel愧對太太，同為藝人的Lisa.S當然明白，不過已為人父的Daniel就表示再遇這類角色會慎重考慮：「太太係成年人，當然會明白，但小朋友就唔會明，我知道將情緒帶返屋企係唔好，我都要好好學習，唔好將工作情緒帶返屋企！」
Hair：Alex Chan@fifth
Make up：Jane Leung
Venue：星影匯The Metroplex
Wardrobe：Sacai， Diesel
文：影視組