關禮傑搞笑麻甩老婆最like
關禮傑最近於電視機內曝光率勁高，雖然年過50，但身形樣貌拍得住一班後生小生，對於兩套劇中分別演出嚴肅和搞笑麻甩的角色，太太和囡囡同樣like爆，還大爆太太睇到嘻嘻哈哈，不過演嚴肅的一面時卻嚇怕囡囡的同學。
近日晚上扭開電視機煲師奶劇，連續兩套劇都有一位為人熟悉面孔，他就曾是80、90年代的當紅小生關禮傑，雖然已是52歲，但如吃了防腐劑一樣，樣貌與身形十年如一日，只是演出的戲路與以前大不同。
新角色刮目相看
對於身材依然fit爆，問到關禮傑是否有特別養生秘訣？他笑說︰「因為成日做運動，而且呢個圈子自己仲有團火喺度，仲想有代表作，所以呢一團火畀到自己要健康同keep fit，盡量同輝仔（張兆輝）踢波做運動。」
演出過無數劇集，扮演過多類角色，關禮傑最令人印象深刻的，非劇集《新紮師兄》中演柔弱的「好姐」莫屬，亦令外界把他定位欠缺男人味，不過在《叛逃》中「敖sir」一角令人刮目相看，他也直言角色為自己平反。對於被網友把天台飛越到另一棟樓的片段改圖，他表示︰「都係一件開心嘅事，觀眾睇咗又覺得好有趣，認為我自己用心去做，最主要係觀眾有睇關禮傑去做呢場戲反應咁大，再去修改，有人去睇，非常值得，所以冇唔開心，反而係搞笑。」
囡囡同學話mean
提到搞笑演出，他於另一套劇集《愛我請留言》中的麻甩中年男人形象，同樣是新突破，他說︰「搞笑最困難，當然可以再做好啲，我太太同我一齊笑住睇，嘻嘻哈哈幾過癮，而且可以將唔同嘅關禮傑畀人睇到，都幾開心。」究竟太太愛他哪個角色？他表示︰「佢兩套劇都鍾意，不過佢會覺得《愛》劇好睇啲得意啲，《叛》反而外間朋友會鍾意多啲，因為男人cool啲會有型。」他其後還表示︰「囡囡都有睇，佢同學話我好mean（刻薄），不過都係好事嚟。」
攝︰沈健程
場地︰Misto Restaurant
文︰專案組