張天愛貴氣逼人秋生認冇料
黃秋生及黎芷珊昨日到中環錄影無綫節目《燭光晚餐》，邀得名媛張天愛任嘉賓，一向天不怕地不怕的秋生竟稱心情緊張，他說：「我心虛，驚唔夠料同張天愛傾偈，佢係時代嘅代表，佢嘅貴族教養係呢個時代已經消失咗嘅品味，強國人最想有呢種品味，但係用錢都買唔到、培養唔到。（做定功課準備？）愈備咪愈驚，我直頭係恐懼，佢文化深厚，要傾都好多嘢傾。」
讚有男人氣概
秋生被問會否請契女梁洛施做嘉賓？他說：「唔會，啲嘉賓一早定晒，其實我同個個都多嘢講，最近剩係同一個人冇嘢傾，嗰個咪我自己囉！（點睇梁思浩話杜汶澤買棺材唔知碇？）呢個友仔都幾好笑，古靈精怪，搵佢買咪得囉，有八折！佢成日拍埋啲神神化化嘢，搵佢買有八折加化妝，仲送埋衣紙添！哈哈哈，講笑啫！」
張天愛聞得秋生說擔心在她面前「唔夠料」，她說：「點會？我好欣賞秋生嘅男人魅力，佢係由心而發，唔使講嘢都好有吸引力，香港好多流行偶像都好男仔，欠咗啲男人氣概，唔似得外國有夏理遜福，但秋生就好man，咩年齡、國籍都會鍾意佢！」
拒談繼母被殺
天愛談到繼母顏婉玉早前在新加坡被殺，顏的印傭被控謀殺，她說：「我哋好多年冇見面，我覺得無論生活喺邊度，都要睇前睇後，因為你唔知人哋咩背景、修養，係咪有病？就算喺香港都曾經有舞蹈家喺街被殺，我自己喺北京、法國都會小心。（會去新加坡幫手處理繼母後事？）我之前喺北京收到好多電話，我唔想因為我個名而令外界去講呢件事，最好唔好講，呢件只係一件偶然嘅災難。」
文：影視組