祖兒懶理阿澤霆鋒錫番

容祖兒昨日出席活動時透露將飛到瑞士將為好友謝霆鋒的飲食節目《十二道鋒味》做嘉賓，她笑言對當地的「怪味」芝士印象最深刻：「以前畀咗舊助手試，佢話似胳肋底味！」她又指霆鋒將為她炮製甜品，問是否想氹她開心？她說：「佢本身都錫我嘅，佢揀得出埠一定揀最close嘅朋友。」

不過一講到因失言而惹怒她的杜汶澤，祖兒即收起笑容，對於對方套用她那句「君子之交淡如水」來宣傳新戲，她即劃清界線：「咁點啫，人哋嘅事。（佢冇改進？）你覺得咋，我冇留意。（覺得佢反擊緊？）唔回應喇，如果再講，亦顯得我唔夠大量，我選擇唔再講。」

私下冇道歉

她又指阿澤冇私下再向她道歉，但澄清最近報道指阿澤貶低其男友劉浩龍（師兄）是無中生有：「我冇聽過佢講，雜誌報道唔正確。」她指師兄冇為此事生氣，又說：「幾好朋友都好，都唔需要幫我表示立場，純粹係我對呢個人嘅睇法，講完就算。」

對於有網民翻摷她曾講過想做影后，她解釋：「我諗番當時點解講呢句說話呢，一嚟係宣傳期，二嚟佢（杜汶澤）因為呢套戲拎咗獎，我戥佢高興。老實講我好有自知之明，亦唔係認真講呢句說話，如果大家覺得我自打嘴巴都冇辦法。」

文：音樂組