子丹揮劍捍衞港產動作片
「宇宙最強」甄子丹、王寶強及莊思敏等昨日出席新片發布會，即場「揮劍」的子丹大讚老闆揼本宣傳，但他又慨嘆在港借景拍戲甚困難，指政府未有全力支持電影文化。
【鄺蔚霆東莞直擊】甄子丹昨日聯同太太汪詩詩、內地演員王寶強、喻亢、莊思敏及導演羅永昌等，為主演電影《3D冰封俠：重生之門》到東莞觀瀾湖出席發布會，女主角黃聖依則因病缺席。席間，他與王寶強進行揭幕儀式，又即場「運氣功」打手印及「揮劍」為高爾夫球開球，大會更送Figure和漫畫給眾星。對於今次鋪天蓋地的宣傳，子丹大讚老闆好揼本，笑言要給對方一萬個Like：「好多大片喺海底隧道落3、4塊廣告牌，我哋依家有15塊廣告牌。」
慨嘆為借景煩惱
該片拍攝時間長達兩年，子丹表示不辛苦，最難忘是在香港啟德機場搭建的青馬大橋拍攝，並大嘆為借景拍片而煩惱：「呢個應該要表揚，唔係個個（老闆）有豪氣搭景，係要有膽識、信念，唔係有錢就搭成。香港借場拍戲好難，政府喺配套方面都冇全面支持，好遺憾，尤其Hong Kong style功夫動作喺外國有好大影響力，政府唔珍惜電影文化，我覺得好可惜。」王寶強則表示好開心，希望有機會跟子丹再合作。
拍古裝戲晒英文
子丹早前簽約荷里活大型經理人公司CAA，問到是否將接拍西片？已落實拍《臥虎藏龍2青冥寶劍》的他說：「冇刻意去拍。《臥虎2》都係西片，其實七年前已經搵我拍，自己一直猶豫不決，上年去康城都仲十五十六，古裝戲我拍得多，但講英文就第一次。」
另莊思敏笑稱在《3D冰封俠》中負責夜蒲，大讚王寶強打得勁。雖然今次未有打鬥戲，但她謂：「做猜枚『拳手』都OK，我訓練有素。」玩開賽車的她又自言可拍飛車戲。
文：影視組