張智霖玩互動做紅館獎門人
張智霖（Chilam）千萬「被包」舉行演唱會，暑假攻陷紅館化身獎門人，與粉絲瘋狂互動，歌迷大有機會「又食又拎」滿載而歸。門票未正式開售，預購消息卻已瘋傳，Chilam呼籲支持者小心，不排除加場的可能，杜絕騙徒有機可乘。
Chilam相隔3年再踏紅館開個唱，獲超過10個廣告商瞓身贊助，Chilam由頭「被包」到落腳，製作費合共加碼千萬，教台前幕後振奮不已。對於今次演唱會，帥哥非常重視，日前走進影棚拍攝演唱會海報，他更親自操刀設計概念：「我覺得演唱會唔一定淨係唱歌跳舞，可以同台下觀眾多啲互動交流，所以今次定名『Crazy Hours』。我承諾會同大家過瘋狂嘅一晚，化身獎門人大派禮物，抽唔到上台玩遊戲嘅，起碼都有罐飲品拎番走吖。」
不排除加場
演唱會初定7月6至8日3場，日內將展開優先訂票，但內地日前已瘋傳正式預購一事，Chilam與團隊亦感莫名其妙，藉此呼籲大家要多加注意：「唔好心急，透過銀行，或者我fans club買票就最穩陣，況且可能有驚喜畀大家呢！（加場？）梗係唔排除呢個可能性啦。」據悉，Chilam紅館一站仍未揭開序幕，但已有海外製作單位主動誠邀他舉行全球巡迴演唱，目前正洽談中，待完成所有演出後，Chilam的收入總額將再增添「幾個零」，名副其實的財源滾滾來﹗
檔期密麻麻
另外，Chilam接下來檔期排得密不透風，日內將走埠開拍新片《千億惡魔愛上我》，然後投入演唱會演出，接着再夥拍吳鎮宇開戲，秋天則接力開巡唱。對於近日頻頻被拍得上街食飯，他無奈表示：「咁忙都要食飯嘅，咪以為我偷懶呀。」
文：影視組