吳彥祖壓抑魔性谷爆油站
吳彥祖（Daniel）與張家輝等演的英皇電影《魔警》中有多場大型場面，其中的油站大爆炸戲，是重頭戲之一，製作費達700萬，劇情講Daniel與安志杰置身火海，導演林超賢要求Daniel作情緒大爆發展露魔性，Daniel拍畢要花兩周才能平復心情！
林超賢執導的英皇新作《魔警》中有多場爆破戲，其中一場重頭戲，是吳彥祖追捕疑犯安志杰時，車輛失控炒入油站釀成大爆炸，電影公司斥350萬搭出一個幾可亂真的油站，之後再將這個油站摧毀。由於這場戲涉及多個爆破場面，據悉製作費高達700萬。
精神負擔大
Daniel與安志杰身處火光熊熊的油站中演追逐戲，兩人狂標汗頓變「水人」，Daniel更要將情緒推至極點，他謂：「呢場係我最後一組戲，拍攝第一日起，導演都要我處於情緒壓抑狀態。直至到油站戲，先一次過將所有魔性爆發出嚟！」
之後Daniel在戲中又因被事情牽動，引發出人性，Daniel直言：「喺咁短時間內要轉換兩種極端情緒，精神負擔好大，加上油站爆炸係真火，唔可以NG，最多只可以拍兩個Take，而導演好重視呢場戲，我畀咗好多壓力自己。」拍完這場戲，吳彥祖和家人即時飛南非度假一個月抽離角色，他說：「喺南非頭幾日，仲未可以正常說話，成日唔出聲喺度發呆，花咗兩星期先回復正常。」
安志杰傷背
同場的安志杰要被吳彥祖從車內拉出，安志杰落地時撞傷背部，他說：「當時好痛，但場戲講我受重傷昏迷，拍攝緊又唔可以嗌出嚟，只好死頂。之後發現背脊瘀咗大撻，跟住兩晚要趴喺度瞓。」
文：影視組