祖兒教訓阿澤拒合作電影

杜汶澤上周六在首場「伍樂城幻想國度作品演唱會56X LIVE 2014」自爆當初打算藉電影《DIVA華麗之後》捧祖兒做影后，但女方冇獎攞，反而帶挈自己做影帝！之後他更選唱祖兒歌曲《逃避你》，沒料這番話會激嬲祖兒！前晚第二場演唱會，祖兒以火紅造型應景出場，還親自演繹《逃避你》。完騷後問她心情如何？祖兒謂：「冇事啦，我講完就冇嘢嘅。（阿澤有冇打畀你道歉？）冇喎！」

選唱《逃避你》

提到阿澤兩度留言道歉，問祖兒可會接受？她說：「睇表現，觀察多一陣先。」祖兒續稱：「但呢個人要教訓一吓係真嘅！因為唔係一日嘅事，好難盡錄。（佢有前科？）梗係啦！（之前開罪你定係你啲朋友？）好多啦！（覺得秋生講得啱？）所以我好支持秋生嘅，但今日講完嘞，自己唔想再講，唔想變為一個是非。」對於以「唯一討厭的圈中人」形容阿澤，她坦言：「咁你都知嚴重性啦！」

阿澤一向多口，今次辣着出名好脾氣的祖兒。

泳兒晒香肩性感獻唱。

問祖兒選唱《逃避你》是否因阿澤唱得太差？她謂：「唔係，一早定咗會唱。（原諒阿澤？）君子之交淡如水，可以觀察吓囉，可以畀啲時間。（你紅色造型代表佛都有火？）唔係呀！」之後更稱不會與對方合作拍戲。那麼男友劉浩龍可有安慰？她說：「唔使安慰，亦唔需要任何朋友表現立場，因為大家都係呢行會好尷尬。」

克勤與祖兒落力獻唱《刻不容緩》。

伍樂城很感激一眾好友擔任嘉賓。

克勤唔敢亂噏

另外，前晚李克勤任演唱會壓軸嘉賓，在台上撐祖兒寸阿澤：「今日唔敢亂講嘢，聽講尋晚（大前晚）有人亂講嘢得罪咗一個無辜嘅人。」之後他以「受害者」介紹祖兒出場，氹得女方笑逐顏開。合唱時，克勤更拍拍祖兒膊頭以示支持。而陳慧琳、Twins、衞蘭繼續做嘉賓，還有泳兒、何嘉莉等。

文：音樂組