朱璇黐餐陳爽嫌電燈膽
2008年華姐冠軍朱璇與人妻陳爽相識多年，在一眾華姐中，陳爽儼如一個「大家姐」，對「小妹妹」朱璇更是非常照顧，每逢過節都如「孖公仔」般，成班好姊妹踩上陳爽屋企黐餐，搞到一對新婚夫婦冇晒符，陳爽直言經常介紹「筍盤」給朱璇識，可惜朱璇只鍾情於藝術男，令陳爽也笑言擔心她繼續做「電燈膽」。
直腸直肚說話hurt人
朱璇：第一次見你應該係我選華姐嗰陣，你畀我嘅第一印象，當日你頒獎畀我哋，喺後台你好嚴肅咁同我講：「知唔知你頭先喺台上唔應該咁做，你好Chok呀，你搶晒人哋嘅戲。」我初初覺得你好嚴肅、距離好遠，好似講咩都好慢。
陳爽：我唔記得喇，因為我個人講嘢好直，好多時傷害咗人都唔知。
朱璇：都未到傷害嘅，初時覺得你應該幾難相處，但有年中秋，你帶我去同李亞男同其他教友去做節，之後你好熱情，成日打電話畀我，見到面都會問我最近點，點解你會無啦啦搵我嘅？
陳爽：因為嗰時我哋住同一棟大廈，同樣都冇屋企人喺香港，所以過時過節，都選擇大家一齊聚，食吓飯、傾吓偈，同你哋都好多話題傾，我哋又同公司、同一個經理人。
唔吼筍盤紅娘無符
朱璇：你知唔知喺我哋心目中，你好似大家姐咁？你好溫柔，雖然有少少脾氣，但基本上都唔會發作。你同宋熙年、亞男都好似家姐咁，唔知係咪覺得我啱啱嚟香港呢？嗰時我咩都唔識，好徬徨，好彩有你哋喺度，可以向你哋問好多問題。
陳爽：當時我只係覺得又嚟一個乜都唔識嘅人、咩都帶吓你，好似個大家庭咁，又可能我細個嗰時啲表弟妹好多，所以習慣個角色係照顧人。一開始識你，覺得你係個有potential嘅女演員，我哋一齊練演戲嗰時，你演得好好，我好鍾意，你應該有好好嘅發展，但識咗之後，發現你係表面聰明，事實上係傻吓傻吓，對鍾意嘅人你會全心全意去對待，所以我好放心同你交朋友。
朱璇：接觸後我都覺得你係外冷內熱，有時我是但講句好想返北京，你就真係記喺心，去睇幾時有平機票，好細微嘅嘢你都會注意到。起初入公司，你知我驚台慶好多人，你會主動咁行埋嚟帶住我，仲介紹啲同事畀我識，全程陪住我，嗰刻我感覺終於搵到個屋企人。
陳爽：同你哋班姊妹真係咩都傾，成日講吓邊個男仔靚仔，不過我都介紹過幾個男仔畀你，條件都幾好，起碼過到我嗰關，人又純品，事業都唔錯，個個鍾意咗你之後，你都唔鍾意人。
宅女脫胎自信爆棚
朱璇：因為你搵到個咁好嘅老公，佢已經係一個標準，好自然就會將其他男仔同「姐夫」（陳爽老公）比，我覺得「姐夫」好愛你、好照顧你，佢仲好聰明又醒目，計數同做嘢都好叻。
陳爽：係呀，我老公識好多嘢，觀察力好強，可以教到我好多嘢，婚後佢講咩我都好接受佢嗰套。
朱璇：我覺得你同「姐夫」拍拖後變咗好多，你以前好宅女o架，唔出街唔貪靚，仲要唔主動同人傾偈。
陳爽：以前真係人哋叫我先出街，又從來唔飲酒，仲成日着平底鞋，我好少着高跟鞋。其實好睇男人點影響個女人，之後我發現原來着高跟鞋對腳係好靚，老公成日讚我就更加有信心，以前飲酒好小心啲，但依家會覺得幾好飲。
朱璇：我覺得我個性格同以前嘅你好似，除非有朋友約去食嘢飲嘢，如果唔係我唔會去蒲，因為我唔鍾意。
30歲後旅行搵艷遇
陳爽：咁其實你係咪鍾意啲有藝術氣質、高大靚仔有型、又要好Man嘅男仔？
朱璇：我鍾意啲男仔喜歡畫畫、睇電影、聽音樂，我諗住30歲之前拍唔到拖，就唔做嘢去旅行搵艷遇。其實你介紹嘅男仔好好，好成熟，又有自己事業，但我覺得距離好似好遠，佢哋通常都講自己專業嘅嘢，佢哋講嘢我唔係好聽得明，我講嘢我諗好多人都聽唔明。
陳爽：我開始有啲擔心你，因為啲姊妹個個都有着落，得你未有，大家唔想你再做電燈膽，其實藝術嗰一part……好多男仔都好好人，係可以接受，我都理解你依家呢個moment係有個理想擇偶條件，我之前都好執着。
朱璇：但你成日同我哋講：「我3年幾冇拍拖，識咗年幾就搵到啱嘅人就即刻結婚。」所以我都要等到好似你咁，如果我等唔到，就日日去你屋企食飯，你哋冇晒自己生活啦，哈哈。
陳爽：其實我老公有時都話好煩，哈哈，講笑咋，佢都鍾意你哋嘅，因為係靚女嘛，去到邊都好吃得開。
朱璇：我暫時都未擔心住，只係有少少危機感，尤其個個都拍晒拖、結晒婚，過時過節得番我一個人，好心酸。我覺得圈內人唔會揀番公司嘅人，因為成日見住好尷尬，所以我唔會揀公司同事。
後記：無飯主婦老公照顧
朱璇外表斯文，個性單純又爽朗，受訪當日更跳跳紮，不停擺出騎呢趣怪甫士，相當可愛。相反，去年底跟金融才俊梁梓軒結婚的陳爽，性格則溫文成熟，難怪她以「小妹妹」稱呼朱璇，更大爆對方「咁大個人仲匿喺屋企睇漫畫」，可謂宅到爆。不過人前賢妻的陳爽，私下原來廚藝麻麻，無他，皆因嫁了個「大廚」好老公，日日煮飯給一班華姐，認真幸福滿瀉。
文：影視組
攝：林蔚恩
場地：Mr. Steak Grill