蕭正楠踢館畀蔡思貝收服
蕭正楠（Edwin）與蔡思貝（Sisley）前日到拳館為無綫新劇《商戰》角色練習泰拳，Edwin打沙包練習時拳拳到肉獲師傅讚有板有眼，二人練習對打時尚算認真，但之後就忍不住笑。而Sisley十歲時已學過功夫，故都有同Edwin「過招」。
冇啖好食
Edwin表示劇中角色鍾情於打拳，晚晚去踢館非常兇狠，但遇上Sisley時卻慘遭「滑鐵盧」。今次在劇中演拳手，未操過肌的Edwin實行超級減肥大計：「食健康餐、戒鹽、戒甜、戒澱粉，人生真係冇晒樂趣！之前體重都有170磅幾，隔咗兩個月得番150磅！」又笑言廿多年來首次嘗試操肌：「真係好攰，朝早會因為肌肉痠痛而痛醒，起身去廁所仲好似阿伯咁要扶住，企都企唔穩！（有6舊肌未？）依家得4舊咋，未齊，遲吓可能有！」
飾女掌門
Sisley劇中飾演拳館女掌門，Edwin踢館時遭她兩、三下就搞掂。Sisley笑言：「以前雖然學過打功夫，不過今次係新嘗試。同一時間要兼顧好多嘢都幾難。（師傅惡唔惡？）佢對我好好，我想練習但係佢叫我抖下，擔心我受傷影響拍劇。」
文：影視組