馬浚偉喪飲齋啡慢性自殺

馬浚偉日前因頭暈及血壓「爆標」入院,經檢查後仍未找到病因,他坦言當日最擔心自己中風不死累及家人。他又自爆日飲五杯齋啡,被醫生指猶如慢性自殺,故經過今次事件,他決心戒飲齋啡。

馬浚偉、楊怡、麥長青(麥包)、邵美琪、黃長興、龔嘉欣等昨日到尖沙咀,為無綫劇集《守業者》進行花車巡遊谷收視,麥包笑言收視不到42點會不停重播劇集,被人取笑他學習亞視,麥包說:「點學呀?佢哋連32點都冇啦!點追都追唔到啦!」

馬浚偉日前因頭暈及血壓超標入院,留院一晚後已經出院。留醫期間,他進行照腦、驗血、心臟檢查,但暫時未查明病因,他稱可能與心臟一直患有神經短路有關。馬浚偉坦言最擔心中風:「嗰日入到醫院頭暈眼花,後腦好似充血脹晒咁,手腳又不停咁郁動,血壓去到180度,醫生都驚我係中風,自己最驚中風唔死得連累家人照顧。」

美國登台藥物傍身

原來馬浚偉有日飲五杯齋啡的壞習慣,被醫生指猶如慢性自殺,經過今次入院,他下定決心戒飲齋啡。他又透露完成劇集宣傳後,今日將起程到美國登台,由於門票已賣清及簽了合約,故帶病在身的他亦要如期前往,惟有帶備藥物傍身。

楊怡自誇天生麗質

另外,有傳楊怡整容以拉近與羅仲謙的姊弟戀距離,她否認整容,並自誇天生麗質:「話我零瑕疵,又話我鬼婆鼻、安祖蓮娜嘴!我呢排開工拍劇咁忙都冇時間休息,證明我保養唔錯,天生麗質。」對於又再被指整容,她說:「唔寫呢啲寫乜?都唔係新鮮橋,好過話我壓力大爆瘡。」對於羅仲謙讚她靚女,楊怡說:「唔係本來,係根本係靚女!」

文:影視組