甄子丹鐵漢也低頭
「宇宙最強」甄子丹於螢幕上的英雄形象深入民心，脫下戲服，子丹亦是出名的好丈夫、好爸爸，他愛錫家人，對錯過子女的成長片段會感到內疚，所以他很珍惜陪伴子女的時間，甚至想溺愛他們，支持他們做想做的事情，更不抗拒女兒加入娛樂圈，對於一對心肝寶貝，子丹絕對是一位「Yes man」！
甄子丹在螢幕上打遍天下無敵手，早已是武打巨星，他與太太汪詩詩結婚至今踏入第十一個年頭，二人所生的一對子女活潑可愛，長女Jasmine現年十歲，兒子James七歲，構成一個幸福家庭。子丹事業、家庭兩得意，「宇宙最強」這個稱號絕對當之無愧！但對於「最強」，子丹卻有另一番見解：「我覺得最強其實冇一個定位或頂位，佢對我最大意義係我會不斷upgrade自己，佢係一個精神，而唔係一個終點，冇話去到邊個位就最強，呢個世界上最強就係不斷去提升，好似一個力量咁，會有延伸，會有感染力。」說的時候，子丹眼神堅定，相當貼合他驍勇善戰的形象，但其實他私底下鐵漢柔情，面對自己的小朋友更會化身「Yes man」，他笑說：「我想縱佢哋多啲o架，但我亦知道太縱會對小朋友唔好，但有時控制唔到自己，因為少同佢哋一齊嘛，一齊時會特別心軟！」
相處時間質比量重要
子丹坦言工作忙碌，對於錯過小朋友的成長片段，他時刻感到內疚，所以一有空檔便會陪伴一對子女，他又明白質比量重要，不能花很多時間陪伴小朋友，陪伴他們的時候就要全情投入，他說：「一對需要工作嘅父母好多時間喺出面工作，一定疏忽同小孩相處時間，除非你真係冇嘢做，冇嘢做又點養小孩呢？其實都真係幾矛盾，點樣平衡番？就係相處嘅質量，同小朋友一齊時，你係咪全身投入交流同建立感情？如果你真係帶小朋友出街，又唔係好投入，係浪費嗰段時間，唔係時間長短，係嗰個質量問題。」他自言不是嚴父，太太做「醜人」，他說：「詩詩做惡嗰個，但佢哋知道媽媽通常都啱，太太照顧仔女多過我，因為我走咗去拍戲嘛，太太喺照顧小朋友方面又成熟過我，佢點教導小朋友，佢個方法係大多數都啱。」
女兒有天分可入娛圈
每當提到一對子女，子丹表情都加倍肉緊，睇得出他錫仔女錫到燶，他指囝囝James個性似太太比較外向，是一個友善開心的小朋友，囡囡Jasmine則比較斯文內向和保守，比較似他。子丹曾說過囡囡喜歡唱歌，問他若囡囡將來要加入娛樂圈，他可會反對？以為子丹如此愛錫子女，一定會以「娛樂圈工作不穩定」或「太複雜」為由拒絕，但他竟大表支持：「我冇所謂，小朋友如果有天分同興趣，做父母係應該支持。」他不介意女兒入娛樂圈，因為他認為囡囡唱歌絕對有天分：「好多人都話個女好大機會入娛樂圈，我冇問題，當然讀好書先，唔好放棄讀書，主次要分得好清楚，唔一定要讀完大學，但中學一定要，咁我梗係想佢讀完大學，要視乎佢發展係點樣。」
對電影有熱誠有感覺
戲外，子丹演繹爸爸角色肯定稱職；戲內，他入行三十年，有三個角色是他最滿意的，分別是葉問、《西遊記之大鬧天宮》的孫悟空，以及《特殊身份》中的警察臥底，前兩個大家耳熟能詳，但子丹直言孫悟空是他從影以來比較難克服的角色：「真係身心好攰，大家都知壓力幾大，本身演呢隻馬騮已經難，特技化妝、程序，同埋投資又咁大，老闆同觀眾期望咁大，所以依家出嚟口碑OK，我就放下心頭大石。」他表示演員要把自己帶入角色，因為他認為人擁有多元化性格，分別有活潑、文靜、開心、感性和狂野一面，每演一個角色，就要「撻着」那一部分，符合電影人物。問他可會覺得自己是天生的演員？他說：「我覺得我係天生電影人，我唔知我係咪天生演員，唔知點謂之好同唔好嘅演員，呢樣嘢見仁見智，但我絕對認為我係天生電影人，首先我愛電影，同埋我對電影有熱誠同感覺。」戲如人生，正因為這份熱誠，子丹戲裏戲外的角色也演繹得恰如其分。
再拍《西遊》睇緣分
甄子丹最近連任「寶馬香港打吡大賽」的「打吡大使」，本月初香港賽馬會更於跑馬地馬場舉行記者會公布獲選參賽馬匹名單，子丹當日駕駛寶馬進場，相當有氣勢！他坦言今次連任別具意義，因為今年是馬年，在《西遊記之大鬧天宮》飾演的孫悟空曾在天庭任職弼馬溫。他還表示騎術是一項很好的運動，若然小朋友想學騎馬，在安全情況下他絕對贊成，加上囡囡個性成熟，很明白事理，會好好照顧細佬。提到《西遊》開拍續集，有指他不會接拍？他沒有正面回應：「未必唔會又未必話會，依家太早諗呢樣嘢，都未到埋牙，到時至算啦，都係睇緣分，到時要睇個時機係咪到。」
籲政府支持電影業
對於香港電影業，子丹希望政府能夠大力支持，他說：「呢樣好緊要，我喺個圈三十年，目睹幾個朝代轉變，有高有低。香港電影人係好有鬥心，至少我接觸過嘅香港電影人都係有一顆好熱嘅心。」他直指政府給予資源不多：「有好多掣肘，你睇吓韓國同其他國家政府都支持電影業，資源係大好多，好似借景咁，香港細呀，比較困難，所以要得到政府真真正正支持，咁會令我哋香港電影人更團結，有時開戲借唔到景，攞唔到牌，你點拍啫？」