謝霆鋒「迷」惑花都
巴黎是浪漫花都，亦是時裝之都，早前的巴黎時裝周圓滿結束，型人雲集的情景卻記憶猶新，而且粒粒「星」為在潮人集中地展現一份時尚味道，都落力裝扮，希望能夠鶴立雞群，成為焦點所在。正如向來裝扮casual的謝霆鋒一反常態變得官仔骨骨，被星級造型師郭慶彬（Ricky）大讚他的迷彩西裝套裝很有時尚感；而文詠珊（Janice）本來着出young girl感覺，卻可惜化錯妝成為敗筆。
謝霆鋒
官仔骨骨造型同佢平時casual打扮好唔同，迷彩西裝套裝好trendy，襯埋對窩釘皮鞋更加時尚，如果加多個clutch會更潮！
文詠珊
佢着出young girl感覺，條裙pattern好啱佢年紀，襯埋復古小手袋同裸色鞋，顏色柔和，如果化個清淡妝，會更順眼。
桂綸鎂
呢個打扮係好花，但佢着出嗰種型格感覺，紫色clutch更加增添造型嘅潮味，反而襯對黑色或深灰色絲襪，有效修飾雙腿線條，望落更修長。
范冰冰
好平凡，似普通人行街造型唔突出，完全冇星味，加埋個濃妝同open-toe shoes襯法，冇驚喜之餘，娘味重。
Rihanna
顏色一眼望落去好有春天感覺，剪裁富現代感，而腰包將會係潮流之一，佢快人一步襯先，仿珍珠手鈪有畫龍點睛效果，直髮好順眼。
水原希子
打扮好青春，metallic手袋尤其突出造型，如果改襯metallic藍色鞋，與手袋互相呼應會更sharp，因黑短boots襯得太穩陣，唔夠特別。
花卉迎春夏
眾多的圖案被各門派的設計師演繹出五花八門的形態，今期卻以迷彩與花卉圖案跑出，然而花卉圖案每逢春夏都成為大熱圖案，而迷彩就多得Valentino設計孖寶Maria Grazia Chiuri與Pierpaolo Piccioli推波助瀾下大熱起來，承接秋冬的熱潮！
PROFILE
著名星級造型師郭慶彬（Ricky）曾遠赴米蘭與巴黎時裝周，出席Max Mara、Sportmax、Chanel、Valentino、Gucci與Jean Paul Gaultier等品牌的時裝騷，也曾被邀在中國時尚節目《美麗俏佳人》擔任嘉賓主持。現於電台擔任客席嘉賓大談時裝之道與配搭技巧，近年也被各大品牌邀請客串造型顧問，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位被肯定。