陳奕迅迷失呻辛苦
【羅宛君澳門直擊】陳奕迅（Eason）近年飽受壓力頻頻發牢騷，前晚他在澳門的巡唱中再度「發噏風」，先戲言不認識天后王菲，接住表示被誤解而迷失，他高呼：「呢幾年真係好辛苦！」
Eason前晚在澳門舉行一連兩場巡迴演唱會澳門站，太太徐濠縈、女兒陳康堤及父親陳裘大齊齊撐場。近年Eason不時在公開場合「發牢騷」，加上去年底斥資2億購豪宅贈老婆，單是每月供樓要60萬，計埋一家三口生活費，保守估計每月要過百萬使費，難怪他壓力爆煲而頻頻「發忟憎」同「亂噏」。
戲言唔識王菲
「吹神」Eason當晚一口氣唱到Encore前才開金口：「之前同李克勤講開，你哋知唔知邊個李克勤？」歌迷表示知道，Eason即說：「嘩！好難講o架呢個世界。」隨即亂噏說：「唔知點解啲人覺得我識晒娛樂圈嘅人，有人叫我整兩張王菲嘅飛，其實我唔識佢，我只係同佢同一經理人。」
Eason曾與王菲合唱，現場歌迷發出「哦」聲，他說：「香港人特別敏感，一講咩就哦，所以頭先我唔講嘢。」隨即大呻辛苦：「知唔知我好辛苦？呢幾年真係好辛苦，做唔番自己，我咩都講同直接，你哋啲嘢好難食，話之你咩酒店。」接住又指與歌迷冇緣分：「今日狀態唔係幾好，唔係我係你，我行遠咗，你跟到我時再講。」