Kelly掛囝囝視像淚鬥淚
靚媽陳慧琳昨日出席活動時透露下周將到內地工作十天，她指大仔劉昇肯定會趁機作反，即使咳到睇醫生都照吃薯片飲汽水。而她不在港時會跟囝囝視像通話，囝囝反會因此更掛念她而哭起來，令她也心痛得哭出來。
陳慧琳（Kelly）昨日以一襲紫色低胸吊帶裙出席時裝品牌MaxMara的活動，令她險些洩春光，問到Kelly是否一步一驚心？她說：「唔會，啱啱幫呢個品牌影完相，趕住過嚟，（試過出活動衣不稱身未？）經常都會，因為啲衫係最新嘅，未有得買，係Model行runway着嘅衫，我哋一定唔係好啱身，所以會帶定扣針、針包。」
細仔未作反
Kelly又透露下星期要到內地工作十天，到十個地方宣傳電影《盜馬記》，她坦言不捨得一對囝囝，她說：「事前有同佢哋講，同埋要交帶功課畀人幫手睇住。（你唔喺香港，囝囝會唔會作反？）佢（長子劉昇）作梗啦，食薯片飲汽水，咳到睇醫生都唔理，佢爹哋又由佢。（你做衰人，爹哋做好人？）佢成日都唔記得佢病，照畀佢食。（囝囝會唔會想你唔喺屋企？）依家都想我返嚟，可能愈大愈想我唔喺屋企。細仔就未作反住。」
Kelly離港工作時都會與囝囝傾視像電話，她說：「反而見到會仲掛住，佢哋同我視像完但喺屋企唔見我會喊。（你咪好心痛？）心痛呀，所以我又喊埋一份。」
周汶錡恨生
同場的名模周汶錡（Kathy）婚後一直想生B，問到Kathy可有好消息？她說：「呢樣嘢急唔嚟，努力緊。（驚唔驚個妹爬你頭？）佢爬我頭唔緊要，最多幫佢湊喇，聽聞佢好忙，要拍劇。佢有叫我快啲生，話幫我湊，佢真係好鍾意小朋友。」
文：名人組