嘉玲網晒泳照 偉仔唔OK
梁家輝與一對孖女泳裝照近日於網上瘋傳，被大讚寶刀未老之餘，孖女亦相當索爆，昨晚家輝聯同拍檔劉嘉玲出席新戲首映時，嘉玲透露與老公梁朝偉出埠時，偉仔也會操刀為她留倩影，笑指不介意把泳照公諸同好，反而偉仔卻有點介懷。
劉嘉玲、梁家輝、衛詩雅、許靖韻、鍾鎮濤、張致恒、陳思誠等昨晚出席英皇電影《北京愛情故事》首映，老闆楊受成特別前來撐場，於片中飾演假裝偷情夫妻的嘉玲與家輝，透露於希臘拍攝期間，湊巧撞正兩人各自的結婚紀念日，當時他們的另一半也結伴前往當地探班，令眾人尤其難忘。
老公在日本滑雪
一身高貴打扮的嘉玲，對於該片於內地票房高達4億人民幣感高興，但認為票房未能控制，故不會因而對香港票房感壓力。談到家輝與一對孖女泳照近日於網上瘋傳，還獲不俗評價，嘉玲對此亦大讚：「佢哋呢對父女情好自然，係件好事，（你同偉仔出埠會唔會影？）都會，不過佢影我多，（介唔介意放上網？）唔介意，佢介意多啲，（會唔會叫偉仔小心處理啲相？）唔使特別小心，泳衣係正常，唔係大件事，依家係iPhone年代，咩都會拎出嚟影，唔靚咪叫佢delete囉！」
問到與家輝合作的難忘事？嘉玲指劇組在愛琴海逗留10天，於藍天白雲環境下開工，感到相當舒服，更謂：「真係每日都會笑醒，計劃想再去呢度旅行，因為有好多小島，求其影張相都好靚，我仲有好多地方要去，好似睇北極光咁。」嘉玲更指偉仔身在日本滑雪未能相伴現身。
家輝撐女兒入行
而家輝被問到女兒有否獲他批准，才把其泳照放上網？他笑謂：「咁大個唔使樣樣都要問，我係公眾人物冇咩所謂，（咁sweet！）有啲仲sweet，（太太冇喺相入面？）因為媽咪揸機，佢身材太好，女兒驚畀媽咪搶鏡，（網友讚女兒索爆，有條件入行！）成日開家庭會議都冇講呢件事，佢哋仲有年幾先畢業（贊成？）唔會唔贊成，入行條路要自己行。」
文：影視組