阿田寸秋生 躁底犯太歲
視后隻揪影帝，田蕊妮代夫出頭最巴閉！杜汶澤與黃秋生一向公認好戲又好火，兩個惹火之人多次在網上交手都搞到六國大封相，繼日前秋生鬧爆阿澤在圈中冇朋友後，這場兩個大男人之間的戰火正式蔓延到田蕊妮身上。眼見老公被踩到上心口，阿田表示他們有「好多朋友」，更不留情面幫秋生（Anthony）起朵做「Anything Wrong」，又寸秋生犯太歲兼躁底，實行大發雌威護夫。
黃秋生與杜汶澤同是性格演員，鏡頭後的他們經常勇於發表個人意見，但有時未必人人啱聽，他們多次在網上展開口誅筆伐，猶如火星撞地球。日前又一次是「留言惹的禍」，再度觸動兩個大男人的神經，在網上隔空互寸，秋生前日出席活動時「秋」後算帳，直踩阿澤在圈中冇朋友，可見大戰一觸即發。
「都冇鬧交」
說時遲，那時快，阿澤愛妻田蕊妮昨日正式加入戰場，在電台受訪時，被問到可有留意秋生鬧阿澤的新聞？阿田說：「點會睇唔到？咁當眼！唉，我真係百思不得其解。」問可覺秋生啄實阿澤唔放？有備而來的阿田索性封洋名Anthony Wong的秋生做「Anything Wrong」：「係囉，Anthony Wong，Anything Wrong？叫佢改吓名，明明私底下冇事發生。」
阿田亦拒做和事老，力撐老公打不還手，罵不還口：「冇呀，我覺得冇咩需要和事，都冇鬧交，我老公都冇鬧過佢，我見唔到有來回。」對於秋生寸阿澤圈中冇朋友，而秋生是「最後一個離開」，阿田笑住反擊：「走咗去邊度？我仲喺度呀，仲健在，冇咁短命。薛凱琪、吳君如應該未走，未離開香港嘅，我一路都覺得我哋仲有好多朋友。」
「唔使氹佢」
阿田又稱不會勸阿澤減少發表意見，因香港是個言論自由的社會：「佢都唔係講好多嘢，我相信杜生同秋生都係有熱誠嘅人。」問阿澤心情可有受影響？她說：「睇佢就冇乜嘢，唔使氹佢，唔係熱血嘅人先可以話佢冷血嘅。（抱不平？）我冇乜血，上唔到腦，諗唔到嘢。」
記者笑問阿澤今年是否犯太歲才易惹是非？阿田繼續寸爆秋生說：「咁要搵條罅畀佢（阿澤）攝（太歲），但秋生似犯太歲多啲，佢個人好躁底。」至於事件另一主角秋生在截稿前未有回應。
文：音樂組