金像影后珍妮花羅倫絲（Jennifer Lawrence）帶同女友人出席日前舉行的奧斯卡頒獎禮，事隔數日對方於網上盡數當晚見聞，仲話被攝影師嫌棄冇名氣，更爆粗叫她行開。
珍妮花於今屆奧斯卡紅地氈上再度仆親，當時她出手抓着的女士，原來是她相識多年的好友Laura Simpson。前日Laura於MySpace上載一篇名為「冇人理我去咗奧斯卡」的網誌，盡數當晚見聞。
她透露獲珍妮花邀請而有機會出席這個一年一度的盛典，但從揀選禮服開始便令她很不快，到達現場後發現有一批人手持大聲公叫囂，疑為「反奧斯卡」分子示威。之後她重提珍妮花跌倒事件：「我嘅約會對象食屎，仲整亂我啱啱整好嘅髮型，好多閃光燈同人穿插，但冇人問我需唔需要幫手，人人當你完全透明，除非你好有名氣。」Laura仲話唯一有人跟她說話的機會，是她阻擋鏡頭的時候，「紅地氈攝影師大叫：『你條裙好巨型，行X開』。」
雖然行紅地氈唔開心，但Laura亦憶述不少趣事，例如謝茜嘉比爾（Jessica Biel）替她開門、Channing Tatum幫她執銀包，以及凱麗華盛頓（Kerry Washington）問她攞零食，另她大讚畢彼特（Brad Pitt）身上有獨特香味，問對方用哪一款古龍水，畢佬抵死回應：「我唔用古龍水，應該係我嘅體香！」
此外，珍妮花男友尼古拉斯霍特（Nicholas Hoult）登上雜誌《V Man》封面，於訪問中透露很享受與珍妮花一起拍戲的時間，名副其實寓拍拖於工作，又大讚女友未有因成名而改變，對他來說很「特別」。
文：外娛組