張智霖世外低人拒高調晒愛
【記者黎寶倫廈門擊】藝人張智霖（Chilam）昨日與蕭定一、王祖藍、王菀之（Ivana）、雨僑以及莊思敏等人齊齊遠赴廈門，出席「《Delete愛人》廈門記者招待會暨映聯萬和影城隆重開業典禮」。Chilam登場即引起現場300 fans哄動，難怪Chilam亦笑言見粉絲如見家人。問到與周秀娜合作的《千億惡魔愛上我》拍攝進度，Chilam表示：「拍咗海報，套戲應該４月開，我３月工作已經滿晒。（《衝上雲霄電影版》點算？）好似５月會開，可以互相遷就，以前都有『鄭九組』啦！」問到城城緋聞以及黃曉明與baby高調晒愛，Chilam笑言：「唔知，我係『世外低人』，不知世事。」
祖藍未求婚
而王祖藍繼電視劇《老表，你好嘢！》後再次與Ivana做情侶，笑言兩個「第一次」都交給對方。問到有沒有親熱戲，祖藍以「煲湯」比喻新戲的平凡愛情，問到是否與女友李亞男愛得平凡？他笑言：「佢煲湯要改進吓，其實佢都有改進，有請教我媽媽點煲，（幾時結婚？）我都未求婚，要一年時間慢慢度橋。」
問到祖藍會否學曉明送車示愛？祖藍笑言要送飛機揮低黃曉明：「再諗個激過曉明嘅，送飛機！不過係「放飛機」！送禮物送個吉盒畀佢咪「放飛機」囉！」
