蘇永康被洩婚訊爆粗鬧吳國敬 發毒誓否認
歌手吳國敬前晚拖女友行婚紗騷時漏口風，誤爆老友蘇永康（阿公）婚期將至，自知講錯嘢的阿敬雖立即耍冧，但被指結婚的阿公仍火遮眼爆粗喪鬧，更以死力證未婚，兩位加埋近百歲的大男人愈「鬧」愈傷心，隨時兄弟反目！
蘇永康與時裝界女友Anita拍拖八年，一直屢傳好事近，可惜只聞樓梯響，不過前晚卻被老友吳國敬爆響口供出婚期，阿公得知後大發雷霆，寸爆阿敬。其實早在2009年有傳阿敬與阿公、張衞健等不和而被叮出BIG FOUR，本以為已冰釋前嫌，想不到4年後不和再度升級。
耍冧話收錯風
吳國敬前晚與女友Elaine出席慈善婚紗拍賣宴時，例牌被追問婚期，阿敬笑言：「求咗好多次（婚）都唔肯。（即場求多次。）唔可以咁造作，定咗日子大家會知道，我都走唔甩。」問到可會爬過一班老友頭搶閘結婚？阿敬即不慎出賣阿公：「肯定爬唔到阿公頭，佢就快啦。」當得知阿公已否認婚訊時，阿敬即面露尷尬說：「咁就唔知，我講錯嘢，等佢鬧吓我，我收錯風啦。阿公，對唔住。」
阿公得知被阿敬亂噏，在電話中激動鬧爆，並發「毒誓」否認與女友拉埋天窗：「我冇結婚！如果我真係結婚就Ｘ街、畀車撞死、再入冊（坐監）、以後都彈唔番起身！」阿公更重提阿敬曾揮刀嚇鄰居一事：「佢不嬲都冇腦，幾十歲人同人鬧完交會拎把刀落樓，吳國敬講嘢唔經大腦！」阿公表示由於與女友都工作忙碌，今年內雖未有結婚計劃，但對女友派心丸：「如果我結婚，一定係呢個女仔！」
范振鋒隨妻走
而前晚同場的還有將離巢無綫的李思欣，她直言唔怕得罪公司：「始終都係搵食，我都要維持生計。」問到與無綫仍有約的老公范振鋒可會擔心影響工作？他說：「唔會啩，禍不及家人。」他亦暗示會跟老婆過檔，但一切還未有定案。
文：音樂組